Ցուցապաստառների վրա մարտիմեկյան զոհերի անունները գրած` մի քանի երիտասարդներ լուռ քայլում էին քաղաքի կենտրոնական փողոցներով:
Մարտի մեկի զոհերի հիշատակը Գյումրիում նշվեց երթով ու մոմավառությամբ: Պատահական չէ, որ երիտասարդները մի քանի րոպե կանգ առան դատարանի շենքի դիմաց` լուռ արդարադատություն պահանջելով: Դատարանն էլ այսօր մարդաշատ էր, քանի որ քննվում էր Վարդան Ղուկասյանի դստեր փեսացու Կարեն Եսայանի աղմկոտ ու դաժան սպանության գործը: Դատարանում հավաքված մարդիկ , մի պահ մոռանալով, որ այսօր մարտի 1- ն է, մոտեցան երտասարդներին` տեսնելու, թե ինչ առիթով է բողոքը: Սակայն ցուցապաստառների վրա կարդալով, որ այն հիշատակի տուրք է, վատ զգացին ու հազար ափսոս տալով զոհերին` հեռացան:
Երիտասարդներից մեկը տեղեկացրեց, որ ինքը դպրոցական է, թեև իրենց մեջ կան ուսանողներ տարբեր բուհերից: Նա նաև հայտնեց, որ շարժվելու են կենտրոնական հրապարակ. Յոթվերք եկեղեցուց մոմեր են վերցնելու ու վառելու են հրապարկում: Ցուցապաստառների վրա զոհերի անուն- ազգանունների կողքը գրված էր «Ոչ ոք չի մոռացվում, ոչինչ երբեք չի մոռացվում»: Նկատենք, որ տարբեր կուսակցական գրասենյակներ ունեցող այս քաղաքում երթի կազմակերպիչները դպրոցականներն ու ուսանողներն էին:
Նունե ԱՐԵՎՇԱՏՅԱՆ
Կարդացեք նաև
