«Եթե նախագահական ընտրություններին մասնակցեին, կհասկանային, որ այն տեխնոլոգիաները, որոնց մասին հիմա խոսում են, ինչ-որ խմբեր են նախաձեռնում, որ պայքարեն, անցյալում են. հիմա չկան, չեն գործում: Հետեւաբար, իրենց համար ստեղծել են ինչ-որ մի պատրանք, խնդիր եւ փորձում են հերոսաբար հաղթահարել դրանք»,- այսօր «Ֆորում» մամուլի ակումբում պատասխանելով տարբեր կուսակցությունների ներկայացուցիչներից Երեւանի ավագանու ընտրությունների վերաբերյալ հավանական ահազանգերին, ասաց ՀՀԿ-ական պատգամավոր Հովհաննես Սահակյանը: Նկատենք, որ որպես փաստարկ բերվում է նախորդ նախագահական ընտրություններում եղած խախտումների վկայակոչումը: Հակադարձելով 17/05 տեղամասի վերաբերյալ ՀՔԾ-ի կատարած ոչ միանշանակյա ընկալելի գործողություններին, ՀՀԿ-ական պատգամավորն իր քաղաքական գնահատականը հնչեցրեց. «Մարդիկ, ովքեր կարծիք են հայտնում իրավական գործընթացներից առաջ անցնելով, նախ պետք է բարոյական իրավունք ունենան եւ դա պետք է ունենան հասարակության առջեւ: Հասարկությանը ներկայացնում են իրենց կարծիքը, որը հետագայում դառնում է քննարկումների առարկա: Այս առումով, կարծում եմ, որ այն իրողությունը տեղի ունեցավ այդ տեղամասում, առիթ է, որ մտորենք ընտրախախտումներին վերաբերվող հայտարարությունների մասին»:
ՀՀԿ-ական պատգամավորը կարծում է, որ Երեւանի քաղաքապետի ընտրությունները քաղաքականացնելու՝ քաղաքական ուժերի միտումը պայմանավորված է նրանով, որ նրանք ռեսուրս չունեն ու իրենք դա շատ լավ գիտակցում են. «Բացի հրապարակներում, ակումբներում խոսելուց, գործ անելու ունակություն չունեն: Եթե մի պահ վարդագույն երազներում պատկերացնում են, որ հանկարծ Երեւանում հաղթեն՝ բա ի՞նչ են անելու, ո՞վ է ղեկավարելու, բա էս խնդիրների առջեւ ո՞նց են կանգնելու: Դրա համար էլ քաղաքականացնում են՝ փորձելով հովհարային անջատումներից մտնել քաղաքական դաշտ»:
Նելլի ԳՐԻԳՈՐՅԱՆ
