Այսօր Շիրակի մարզպետ Ֆելիքս Ցոլակյանն ու Գյումրու քաղաքապետ Սամվել Բալասանյանը Ջարդի ձորում, ուր եկել էին հարգելու Եղեռնի զոհերի հիշատակը, իրենց գնահատականները հնչեցրին Հայոց Ցեղասպանության ճանաչման հարցի շուրջ:
Սամվել Բալասանյանը ասաց, որ Թուրքիան պիտի հասկանա. եթե ուզում է Եվրամիության անդամ դառնալ, պարտավոր է ճանաչել Հայոց ցեղասպանությունը: «Շատ եմ կարևորում, որ էսօր մենք կարողանանք պայքարել միջազգային կառույցներում, որպեսզի բոլորը ճանաչեն Հայոց Ցեղասպանությունը: Ճիշտ է ` շատ պետություններ աջակից են մեզ, ճանաչել են Հայոց ցեղասպանությունը, բայց պետք է կարողանանք գոնե 100 -ամյակի հետ կապված մեր պայքարը վերջնական կետին հասցնենք»,- ասաց Գյումրու քաղաքապետը:
Շիրակի մարզպետ Ֆելիքս Ցոլակյանն էլ, ով մասնագիտությամբ պատմաբան է, հետևյալ գնահատականը տվեց. «Մենք 15 թվական ենք ասում, բայց ցեղասպանությունը վաղուց է սկսվել, սկսենք ավելի հնուց` Սուլթան Աբդուլ Համիդ. դրանից հետո եղած բոլոր դեպքերը, որոնք մեկը մյուսի հետ շաղկապված են, մինչև 20 թվականը: Էսօր մեր ժողովրդին պետք է ուժ, կորով, հավատ և անընդհատ մենք պետք է ոգեկոչենք, հիշենք, հիշատակենք այս օրը, որպեսզի աշխարհը ճանաչի, հասկանա և վերջին հաշվով մենք պետք է անպայման հաղթենք, անպայման պետք է ճանաչեն, և աշխարհը պետք է իր գնահատականը տա: Ճիշտ է, կան շատ երկրներ, որոնք ճանաչել են, բայց էսօրվա դրությամբ մեզ պետք է, որ սրա համար Թուրքիան պատասխան տա: Եվ ես հավատում եմ, որ 21-րդ դարը այն դարն է, որ մենք կարող ենք հասնել մեր նպատակին», -համոզմունք հայտնեց Շիրակի մարզպետը:
Նունե ԱՐԵՎՇԱՏՅԱՆ
Կարդացեք նաև
