Գյումրիից 22 կիլոմետր հեռավորության վրա գտնվող Սառնաղբյուր գյուղի եկեղեցու բակում այսօր նշվեց սառնաղբյուրցիների` 95 տարի առաջ`1918 թվականի մայիսի 18-22 –ը թուրքերի դեմ մղած ինքնապաշտպանական մարտերում տարած հաղթանակը: Այն պատմության մեջ մնաց Սոգյութլվա հերոսամարտ` գյուղի նախկին անունով: Սառնաղբյուրի ինքնապաշտպանական գործողությունները օգտակար են եղել Բաշ Ապարանի եւ Սարդարապատի հաղթանակների համար:
Իզուր չէ, որ այսօր սառնաղբյուրցիները պարծենում էին, թե աղն ու հացը թողեցին թուրքերի կոկորդին: Սառնաղբյուրցիները յուրատեսակ էին պատրաստվել այս տոնին, ազգային երգերով, պարերով, բանաստեղծություններով, հյուընկալել էին մարզի բոլոր բարձրաստիճան պաշտոնյաներին` Շիրակի մարզպետ Ֆելիքս Ցոլակյանին, Շիրակի մարզի ընդհանուր իրավասության դատարանի նախագահ Էդուարդ Մանուկյանին, դատախազ Կարեն Շահբազյանին, ՀՀ ԱԺ պատգամավոր Սամվել Նիկոյանին, ով ծնունդով հենց Սառնաղբյուրից է: Հանդիսավոր միջոցառումը սկսվեց Շիրակ թեմի առաջնորդ Միքայել եպիսկոպոս Աջապահյանի օրհնությամբ: «Սիրելի հայ ժողովուրդ, մայիսյան գեղեցիկ օր է այսօր, եւ Փառք Աստծո, որ մայիսյան այս օրը ապահով պայմաններում ենք, եւ թուրքը մեր գյուղի վրա չի արշավում: Բնական է սակայն, որ միտքը պետք է գնա տասնամյակներ առաջ, երբ ձեր պապերը այս լեռան լանջերին մի քանի հրացանով եւ փչացած թնդանոթով հեռացրեցին թուրք հրոսակներին եւ թույլ չտվեցին, որ մտնեն գյուղ:
Կարդացեք նաև
Սառնաղբյուրի հերոսամարտը մեր պատմագրության մեջ շատ չէ պանծացված եւ ահավասիկ պահն ու ժամն է , որպեսզի սառնաղբյուրցին եւ շիրակցին ցույց տա բոլորին, որ պարծենալու առիթ ունի: Այո, թուրքը մտել է Շիրակ, այո, կոտորածներ արել է Շիրակում, բայց նաեւ հանդիպել է դիմադրության եւ անհավասար պայմաններում նույնիսկ, թվական գերակշռություն ունենալով, թողել , հեռացել է, եւ սա սառնաղբյուրցիների հերոսական նվիրումի շնորհիվ, ովքեր գաղթականի ցուպը չվերցրեցին, փախեփախի ճանապարհը չբռնեցին, այլ թուրքի դեմ դուրս եկան: Եթե ամեն մի գյուղ սառնաղբյուրցու կամքը ունենա, մեր հայրենիքը ավելի մեծ կլիներ, ուրեմն ինչի՞ համար է այսօր այս օրինակը. ցույց տալու մեր սերունդներին, մեծացող զավակներին, թե այդպես են հայրենիք պահում:
Հայրենիքը պահում են հենց այդպես, ոչ թե մտածում են` շատ են, հզոր են զենք ունեն, զենք չունենք, այլ դուրս են գալիս հոգով, ոգով եւ հաղթելու տրամադրությամբ: Տա Աստված, որ գալիք տարիների ընթացքում մենք միշտ մայիսյան օրերին հավաքվենք , պանծացնենք մեր հայրերի հիշատակը եւ ուխտենք նույն ոգով ապրել. թույլ չտալ, որ օտար հրոսակը ոտք դնի մեր հայրենի սահմաններից ներս: Այս լեռները մերն են, այս ձորերը մերն են եւ այս հրաշագործ վանքը մերն է, պահապան պետք է լինենք, որպես ինքն էլ պահապան լինի մեզ», -ասաց սրբազանը: Սամվել Նիկոյանն էլ հավելեց, որ ոչ միայն սառնաղբյուրցիները, այլ Շիրակի մարզի ողջ բնակչությունն է դուրս եկել թուրքերի դեմ ու հենց Սառնաղբյուրում է կարողացել թուրքերին կանգնեցնել, իրենց արժանապատվությունն ու կյանքի իրավունքը պաշտպանել:
Սամվել Նիկոյանը նաեւ նկատեց, որ անարադարություն է, որ Սառնաղբյուրում չկա հերոս նախնիներին նվիրված հուշահամալիր: Նա խոստացավ, որ մյուս տարի այս օրը` հերոսամարտի հաղթանակը նշելիս, գոնե ականատես լինել հուշահամալիրի կառուցման աշխատանքների մեկնարկին:
Նունե ԱՐԵՎՇԱՏՅԱՆ
