Ոսկեվանում դպրոցի տնօրեն չեն կարողանում ընտրել:
Հունիսի 4-ին Տավուշի մարզի սահմանամերձ Ոսկեվան գյուղում կրկին կայացել է միջնակարգ դպրոցի տնօրենի թափուր տեղի մրցույթ:
Տնօրենի հավակնորդները նորից 2-ն են եղել՝ Ոսկեվանի բնակչուհի, գյուղի դպրոցի ռուսաց լեզվի ուսուցչուհի, 16 տարի տնօրենի դաստիարակչական գծով տեղակալ, այդ դպրոցի արհմիութենական կազմակերպության ղեկավար Գոհար Տիրացվյանը եւ նախկինում այդ դպրոցում որպես աշխարհագրության ուսուցիչ աշխատած Գարիկ Մամյանը: Քվեարկության արդյունքում Գարիկ Մամյանի օգտին տրվել է 4, Գոհար Տիրացվյանի օգտին՝ 3 քվե: Դպրոցի կառավարման խորհրդի 8-րդ անդամ Անահիտ Պապինյանն իր դիմումի համաձայն հրաժարական է տվել, կառավարման խորհրդում նրա փոխարինողն ըստ օրենքի իրավունք չուներ մասնակցելու քվեարկությանը: Ոսկեվանի միջնակարգ դպրոցի տնօրենի թափուր տեղի համար նախորդ մրցույթը կայացել էր 2013թ. մայիսի 25-ին, այն ժամանակ Գոհար Տիրացվյանը ստացել էր 4, Գարիկ Մամյանը՝ 3 ձայն:
Նախկինում հայտնել ենք, որ դպրոցի կառավարման խորհրդի անդամ, ֆիզիկայի ուսուցչուհի Անահիտ Պապինյանի վրա ճնշումներ են եղել, որպեսզի նա մայիսի 25-ին չմասնակցի քվեարկությանը, ձայն չտա Գոհար Տիրացվյանին, այլապես վերջինս դպրոցի տնօրեն էր ընտրվելու: Գոհար Տիրացվյանն ասաց՝ իրեն խորհուրդ են տվել, որ դպրոցի տնօրեն դառնալու համար պետք է ՀՀԿ-ին անդամագրվի, ինքը 2012թ. հոկտեմբերին 2 անգամ դիմում է գրել ՀՀԿ անդամ դառնալու համար, սակայն այդպես էլ պատասխան չի ստացել:
Կարդացեք նաև
Տիկին Տիրացվյանի խոսքերով՝ 10 օր առաջ իրենց տուն է այցելել Նոյեմբերյան քաղաքի բնակիչ Գարիկ Մամյանը եւ հայտարարել, որ իր թիկունքում ՀՀԿ կուսակցությունն է, Մամյանն իրեն հորդորել է հանել թեկնածությունը դպրոցի տնօրենի մրցույթից: Գ. Տիրացվյանի խոսքերով՝ Գ. Մամյանը շատ զարմացել է, երբ իմացել է, թե ինքն անկուսակցական է, կարծելով, որ ՀՀԿ անդամ դառնալու իր դիմումներին ընթացք են տվել: Գ. Տիրացվյանն ասաց, որ դրանից հետո դիմել է ՀՀԿ Նոյեմբերյանի տարածքային կազմակերպության գրասենյակ, այնտեղից հայտնել են, որ ինքն ՀՀԿ անդամատոմս չունի: Տիկին Տիրացվյանը մեզ հայտնեց , որ հունիսի 4-ին ինքը Տավուշի մարզպետարանի կրթության վարչության պետ Աշոտ Փաշինյանին ասել է, որ նման անարդարությունների պատճառով են հայերը լքում Հայաստանը: Վերջինս պատասխանել է, թե իրենք օրենքով են առաջնորդվում: Ոսկեվանի դպրոցում 2 մրցույթների արդյունքում դպրոցի տնօրեն չի ընտրվել; Ըստ օրենքի՝ մարզպետ Արմեն Ղուլարյանն իր կարծիքը ներկայացնելով ՝ դիմելու է ԿԳՆ նախարարություն, որպեսզի Ոսկեվանի դպրոցի տնօրեն նշանակեն:
Ոսկան ՍԱՐԳՍՅԱՆ
