Ինչպես Aravot.am-ին տեղեկացրեցին Շիրակի մարզպետարանից, այսօր Շիրակի մարզպետ Ֆելիքս Ցոլակյանի գլխավորությամբ խորհրդակցություն է անցկացվել մարզպետարանում, որին մասնակցել են «Հայջրմուղկոյուղի» ընկերության գլխավոր տնօրեն Պատրիկ Լորենը, ընկերության մի շարք մասնագետներ եւ համայնքապետեր: Խորհրդակցության ընթացքում քննարկվել են Արթիկ քաղաքի եւ նրա շրջակա համայնքների ջրամատակարարման խնդիրների հետ կապված մի շարք հարցեր: Պատրիկ Լորենը Շիրակի մարզպետին ներկայացրել է Արթիկում «Հայջրմուղկոյուղի» ընկերության կողմից իրականացված ներդրումային աշխատանքները: «Կառուցված դրենաժային համակարգի շնորհիվ համայնք հասնող ջրի որակն էապես փոխվել է, բնականաբար խնդիրներն այսքանով լուծված չի կարելի համարել: Արթիկի տարածաշրջանում ջրամատակարարման խնդիրների կարգավորման համար ընկերությունն այլ ծրագրեր եւս ունի»,-նշել է պրն Լորենը: Նա նաև ասել է, թե երկրորդ փուլով նախատեսվում է 3մլն եվրո գումարի ներդրումային աշխատանքների իրականացում:
Հանդիպմանը ներկա են եղել նաեւ տարածաշրջանի 4` Մեծ Մանթաշ, Փոքր Մանթաշ, Գեղանիստ, Արեւշատ համայնքների ղեկավարները: Այս համայնքները ընդգրկված չեն «Հայջրմուղկոյուղի» ընկերության կառավարման համակարգում եւ օգտվում են Մանթաշի Ձորի ջրից: «Հայջրմուղկոյուղի» ընկերության սպասարկման տիրույթ ընդգրկվելու համար համայնքապետերը հետաքրքրվել են , թե ինչ աշխատանքներ են իրականացվելու իրենց տարածքում ջրամատակարարման որակի բարձրացման ուղղությամբ: «Հայջրմուղկոյուղի» ընկերության գլխավոր տնօրենը վստահեցրել է, որ այդ պարագայում ներդրումներ կլինեն նաեւ այս համայնքներում: Շիրակի մարզպետ Ֆելիքս Ցոլակյանը իր հերթին կարեւորել է վերը նշված գյուղերի ջրամատակարարման խնդրի հնարավորինս արագ կարգավորումը, ինչպես նաեւ «Հայջրմուղկոյուղի» ընկերության հետ փոխգործակցված աշխատանքը, որն հանգեցնելու է մարզի բնակիչներին որակյալ եւ 24-ժամյա ջրամատակարարման ապահովմանը:
Կարդացեք նաև
