Կապանում մինչեւ օրս շրջակա միջավայրի պահպանության օրը չի նշվել, թեեւ միչեւ այժմ բազմիցս է բարձրաձայնվել տարածաշրջանում առկա բնապահպանական բազմաթիվ խնդիրների մասին: Շրջակա միջավայրի պահպանության գործում շատ կարեւոր է ոչ միայն տարածաշրջանում գործող հանքարդյունաբերական ընկերությունների ճիշտ գործունեությունը, այլեւ՝ հասարակության շրջանում գիտակցության բարձրացումը: Երեկ շրջակա միջավայրի համաշխարհային օրն առաջին անգամ նշվեց Կապանում, որին նվիրված տոնական միջոցառում էր կազմակերպվել մարզկենտրոնում գործող «Դինո գոլդ մայնինգ քամփնի» ՓԲԸ կողմից: Կարեւորելով օրվա խորհուրդը՝ ընկերության բնապահպանության բաժնի ավագ մասնագետ Հասմիկ Մկրտումյանը անհրաժեշտ համարեց յուրաքանչյուր բնակչի հոգածությունն ու ներդնումը շրջակա միջավայրի պահպանության հարցում, հույս հայտնելով, որ այսուհետ օրը նշելն ավանդական կդառնա համայնքում: Միջոցառման ընթացքում տեսաֆիլմի տեսքով ներկայացվեց ընկերության աշխատանքը, համայնքում մինչ այժմ իրականացված բնապահպանական ծրագրերը եւ առաջիկա անելիքները, որին հաջորդեց թատերական փոքրիկ բեմական ներկայացում:
«Ընկերությունում ներդրվել է հանքաջրերի արդյունավետ օգտագործման համակարգ, որի արդյունքում հանքաջրերի մասնակի վերադարձ եղավ շրջանառու համակարգ, յուղային թափոնների չեզոքացում է կատարվում՝ կենսաբանական անվնաս մաքրման եղանակով: Բնապահպանական ծրագրերի իրականացման վրա ծախսվել է միլիոնավոր դոլարներ, միայն Արծվանիկի պոչամբարի ռեկուլտիվացիան արժեցել է 500 հազար դոլար: Իսկ առաջիկայում նախատեսում ենք թափոնների, վտանգավոր նյութերի ժամանակավոր տեղադրման հրապարակ կառուցել, Գեղանուշի պոչամբարի կայունության ուսումնասիրության, պոչատարի հակավթարային համակարգի ստեղծման աշխատանքներ իրականացնել, 21.6 հա տարածքում անտառվերականգնման ծրագիր անել եւ այլն: Սա կանադական սեփականատիրոջ պահանջն ու արժեքային համակարգն է »,- տեղեկացրեցին «Դինո գոլդ մայնինգ քամփնի» ՓԲ ընկերությունից:
Մերի ՍՈՂՈՄՈՆՅԱՆ