Հայաստանը վերապրել է մոնղոլական արշավանքները, թուրքերի արած ցեղասպանությունը, սովետական ճնշումները, սակայն կարողանում է ուժ գտնել վերածնվելու համար: «Կորիեր դելա Սերա» թերթում գրում է լրագրող Ջան Անտոնինոն:
«Հայերի համար սուրբ Արարատ լեռը՝ իր բազմադարյա ձյունապատ գագաթով մի քանի քայլի վրա է այստեղից, սակայն թուրքական կողմում է», – գրում է հոդվածի հեղինակը՝ մեջբերելով Ֆրանկ Վեստերմանի խոսքը՝ ինչ էլ անես Երևանում, Արարատը միշտ քեզ է նայում, – «Բայց Թուրքիայի սահմանից», – ավելացնում է հեղինակը:
Նա գրում է, որ նույնիսկ եթե հայերը փորձում են մոռանալ իրենց պատմության ողբերգական պահերը, միևնույն է, ամեն առավոտ արևը դուրս է գալիս Արարատի վրա ու հիշեցնում, թե ինչ են իրենց հետ արել թուրքերը:
Նշելով, որ հայերը ապրում են 72 միլիոն իրանցի, 75 միլիոն թուրք և 9 միլիոն ադրբեջանցի մուսուլմաններով շրջապատված, հեղինակը գրում է, որ դա անհանգստացնող երևույթ է, բայց գիտակցելով, որ մահմեդական օվկիանոսում իրենք քրիստոնեական կղզի են, հայերը շարունակում են ապրել:
Կարդացեք նաև
Գալով դեպի սովետական ժամանակաշրջանը՝ լրագրողը գրում է. «Առաջին բանը, որ քեզ կպատմեն Երևանի վրա իշխող Մայր Հայաստան ցիկլոպյան արձանի մասին այն է, որ նրա տեղում եղել է Ստալինի արձանը, որն ապամոնտաժվել է 1967թ., և ընկնելով երկու աշխատողների վրա՝ խլել է նրանց կյանքը, այդպիսով նրանք դարձան ստալինիզմի վերջին զոհերը»:
Հրապարակման հեղինակը գրում է, որ հայերին պաշտպանելու համար թռիչքի են պատրաստ ռուսական ՄԻԳ ինքնաթիռները և կարծում է, որ հայերը ամեն ինչ ներել են Միկոյաններին. «Իսկ Լենինին չեն ներել: Նրա արձանը գտնվում է պատմական թանգարանի ավտոկայանում: Առանց գլխի: Իսկ մատը, որը ժամանակին ցույց էր տալիս սոցիալիստական ապագայի ուղղությունը, այժմ պարզած է դեպի երկինք», – եզրափակում է նա:
Պատրաստեց Հովհաննես ԻՇԽԱՆՅԱՆԸ
