Այսօր առավոտյան ժամը 09.00-ից Վրաստանից Հայաստան բնական գազի մատակարարումը ժամանակավորապես դադարեցվել է: Ինչպես տեղեկանում ենք «ՀայՌուսգազարդ» ընկերության կայքէջից, գազամատակարարման դադարեցման մասին Վրաստանի գազատրանսպորտային ընկերությունը պաշտոնապես տեղեկացրել է, որ նախատեսում է օգոստոսի 8-ին եւ 9-ին իրականացնել վերանորոգման աշխատանքներ «Կրասնի Մոստ» գազաչափիչ կայանում:
«ՀայՌուսգազարդ»-ից Aravot.am-ին վստահեցրին, որ ռեզերվների հաշվին ապահովվում է գազամատակարարումը եւ որեւէ սահմանափակումներ չկան:
Aravot.am-ի այն հարցին՝ օրերս Արաբկիր վարչական շրջանի որոշ հատվածներում, իսկ այսօր էլ Նորք-Մարաշում գազի մատակարարման դադարեցումը կապ ունի՞ Վրաստանի կողմից այսօր կատարվող աշխատանքների հետ, ընկերությունից վստահեցրին` «Ոչ, պլանային վերանորոգման աշխատանքներ են իրականացնում այդ հասցեներում»:
Նելլի ԲԱԲԱՅԱՆ
