«Եթե ուսանողը չի սովորում, անկախ նրանից` սոցիալապես ապահով, թե անապահով ընտանիքից է, ինչո՞ւ պիտի պետությունը նրան գումար տա: Պետությունը թող գումար տա մեկ չափորոշիչի համաձայն` առաջադիմություն, այսինքն` նրան, ով բարձր առաջադիմություն է ցուցաբերում»,- այսօր այս մասին «Հայելի» ակումբում ասաց Կրթության ազգային ինստիտուտի փոխտնօրեն, «Ժառանգության» նախկին պատգամավոր Անահիտ Բախշյանը` հավելելով, որ պետք է հավասար հնարավորություններ ընձեռել սոցիալապես ապահով ու անապահով խավի երեխաների միջեւ: «Ընդհանրապես «Փարոս» և այլ ծրագրերն այնքան են ստորացնում մեր ժողովրդի,. իրենք այնքան են հարմարվում այդ վիճակին, մի տեսակ հստակ ասում են` մեզ նպաստ տվեք: Ես, իհարկե, գիտեմ, որ աշխատատեղ չկա, բայց մարդ ինքն էլ ակնկալում է միայն դա: Պետք է նրա մոտ ձգտում առաջացնել աշխատելու, մասնագիտություն ստանալու»,-ընդգծեց Բախշյանը:
Վերջինս անդրադառնալով` վերջին շրջանում աղմուկ բարձրացրած թիվ 27 դպրոցի միջադեպին, երբ 6 աշխատողներ և ուսուցիչներ ոչ աշխատանքային պայմանագիր են կնքել տնօրենի հետ, հետո յուրացրել են գումարները: Բախշյանը նշեց, որ վերջինիս մեղադրել է Հանրային խորհրդում կրթության ենթահանձնաժողովի նախագահ Կարինե Թումանյանը` ասելով, թե ինչու է կենտրոնանում հենց այդ դպրոցի վրա, որին ի պատասխան տիկին Բախշյանն ասել է. «Սեւեռվել եմ այդ դպրոցի վրա, որովհետեւ սեւեռվելու համար անհրաժեշտ են փաստեր և ես այդ փաստերն ունեի այդ դպրոցում հանցագործության մասին հաղորդում տալու համար, դրա համար էլ այդ դպրոցի նկատմամբ եմ իրականացրել, որից հետո միայն քրեական գործ է հարուցվել և կասեցվել է տնօրենի լիազորությունները»,-հավելելով, որ այս երեւույթներն այնքան տարածված են, որ մեկ տնօրենի փոփոխությամբ ոչինչ չենք փոխում։
Ըստ Բախշյանի` կրթությունն այս ձեռագրով, այս աշխատաոճով իրականացնելով ՀՀ իշխանությունը տապալում է կրթական գործընթացը` վտանգելով երեխաների ապագան.«Կադրային քաղաքականությունը կրթության ոլորտում լուրջ կաղում է։ Հասկացանք, որ իշխանություններին պետք են տնօրեններ, որպեսզի վերարտադրվեն, վերև ներքև համագործակցված աշխատեն, այսինքն՝ մեկը վերցնում է տալիս վերևին, նա էլ թևերը փռում է և ամեն ձևով փորձում պաշտպանել»,- ասաց նա։
Բախշյանի համոզմամբ` համակարգային փոփոխություն է անհրաժեշտ. «Իշխանության մարդիկ պետք է հասկանան, որ իրենք երկրի գոյության հետ են խաղում, իրենք պետք է զգան այդ պատասխանատվությունը, այդ աթոռները վերից վար ծառայեցնում են իրենց հարազատներին աշխատանքի տեղավորելու համար»,- ընդգծեց նա:
Կարդացեք նաև
Քրիստինա ՄԻՐԶՈՅԱՆ
