«Իրենք նման հայտարարություններով եւ մեկնաբանություններով հաստատում են, որ մեր՝ «Բարեւ Երեւանի» ներկայությունն, իրենց պետք է օրինականացնելու համար իրենց անօրեն քայլերը, որպեսզի մեզ էլ ներքաշեն այդ պատասխանատվության մեջ»,- Aravot.am-ին այսպես արձագանքեց ավագանու «Բարեւ Երեւան» խմբակցության ղեկավար Անահիտ Բախշյանն՝ անդրադառնալով Երեւանի ավագանու ՀՀԿ խմբակցության պատգամավորների հայտարարություններին: Հիշեցնենք, որ երեկ ավագանու ՀՀԿ խմբակցության անդամներ Վահե Նիկոյանն ու Նաիրա Նահապետյանն արձագանքել են այն փաստին, որ ավագանու ԲՀԿ-ն ու «Բարեւ Երեւան» խմբակցությունները մաս չեն կազմելու Երևանի քաղաքապետարանի կողմից հասարակական տրանսպորտի ուղեվարձի ուսումնասիրման և քննարկման հետ կապված ձևավորվող հանձնաժողովի կազմում:
Ըստ հայտարարության հեղինակների , սա «ևս մեկ անգամ ապացուցեց վերջիններիս ձեռնպահ կարգավիճակը և պատեհապաշտ վերաբերմունքը երևանցիներին հուզող հիմնախնդիրների լուծման հարցում»։
Տիկին Բախշյանը ՀՀԿ-ի ներկայացուցիչներին հորդորում է երբեք չխոսել պատասխանատվության մասին, առավել եւս չասեն, որ իրենք ինչ-որ պատասխանատվություն են կրում՝ ելնելով երեւանցիների շահերից: «Մենք երեւանցիների շահերից ելնելով՝ այսօր այդ որոշումների օրինականությունը վիճարկում ենք դատարանում եւ ապացուցելու ենք, որ այդ որոշումների տակ եղած իրավական փաստաթղթերում որքան անօրինականություն ու կեղծիք կա: Իրենք չեն ուզում, որ մենք դա անենք, այլ ուզում են, որ մասնակցենք այդ անօրեն, կարգավիճակ չունեցող մի հանձնաժողովի աշխատանքներին, որի լիազորությունները եւ որոշումներ կայացնելու կարգն այդպես էլ չգիտենք»,- ասաց Անահիտ Բախշյանը հավելելով. «Թող իրենք «վայելեն» այդ պատասխանատվության չհիմնավորված զգացումը ու պատասխան տան ժողովրդին այն մասին, թե ինչպե՞ս տրանսպորտի վարձավճարների բարձրացման մասին որոշում կայացրեցին: Դա էլ թող իրենց խղճին մնա»:
Նելլի ԳՐԻԳՈՐՅԱՆ
