ՀԱԿ խմբակցության քարտուղար Արամ Մանուկյանը այսօր ԱԺ-ում Բյուջե-2014-ի քննարկումների ժամանակ ունեցած ելույթում կարճ ու կոնկրետ հայտարարեց՝ «չի կատարվելու այս բյուջեն», եւ բացատրեց, թե ինչու՝ արտագաղթի պատճառով:
«125 հազար մարդու արտագաղթը տաս ամսում ոչ միայն մարդկային, այլեւ արտադրական ռեսուրս է»,-ասաց պարոն Մանուկյանը, նկատելով, որ այդքան մարդ պակաս է հաց գնելու, էլեկտրաէներգիա սպառելու, հարկ վճարելու եւ այլն: «Թվերով ջարդելու» սովոր պարոն Մանուկյանը իր նախասիրած արտագաղթային թեմայի շրջանակներում ներկայացրեց նաեւ ԱՄՆ դեսպանատան տվյալները, համաձայն որոնց 2009-ից սկսած «Գրին քարտի» հայաստանցի հայտատուների թիվը տարեկան ավելանում է տաս հազարով, ապա խոսեց Ստամբուլում հայաստանցիների համար հայկական դպրոցների բացման մասին: Նաեւ անդրադարձավ Հայաստանում ներդրումների կրճատումներին՝ նկատելով, որ գումար ունեցողները նախընտրում են ոչ թե բիզնեսի մեջ դնել, արտադրության մեջ դնել, այլ բանկում 7-8%-ով ավանդ տալ, քանի որ անկանխատեսելի է մեր երկրի իրավիճակը:
Արամ Մանուկյանից հետո ելույթ ունեցավ անկախ պատգամավոր Էդմոն Մարուքյանը, որն անդրադարձավ բյուջեում նախատեսված կամ չնախատեսված մի քանի կոնկրետ հարցերի, վերջում էլ ասաց, որ եթե իր բարձրացրած հարցերին եւ առաջարկներին կառավարությունը դրական պատասխանի՝ ինքը «կողմ» կքվեարկի այս բյուջեին, հակառակ դեպքում՝ ոչ: «Էս պայմաննե՞ր եք դնում, պարոն Մարուքյան… Խիստ եք… Լավ է՝ մեծամասնություն չունեք, պայմաններ եք դնում, ասում եք՝ դեմ կքվեարկեմ»,-կատակեց Ազգային ժողովի նախագահ Հովիկ Աբրահամյանը՝ ակնարկելով Մարուքյանի՝ ոչ մի խմբակցությունում չգտնվելը, ապա խոսափողի մոտ հրավիրելով արդարադատության նախարար Հրայր Թովմասյանին՝ զգուշացրեց՝ ուշադիր եղեք, պարոն Թովմասյան, որ պարոն Մարուքյանի ասածները չանեք, դեմ կքվեարկի:
Մելանյա ԲԱՐՍԵՂՅԱՆ
