Նոյեմբերի 22-ին ՀՀ ԱԺ նախագահ Հովիկ Աբրահամյանն առանձնազրույց ունեցավ Ուրուգվայի արտաքին գործերի նախարար Լուիս Ալմագրոյի հետ:
Ուրուգվայի արտաքին գերատեսչության ղեկավարը կարեւորեց Հայաստանի խորհրդարանի նախագահի առաջին պաշտոնական այցը Ուրուգվայ եւ վստահություն հայտնեց, որ այն նոր որակ կհաղորդի հայ-ուրուգվայական բարձր մակարդակի հարաբերություններին: Նրա համոզմամբ` միջխորհրդարանական կապերը կարեւոր դեր եւ նշանակություն ունեն միջպետական հարաբերությունների զարգացման գործում: Լուիս Ալմագրոն շեշտեց, որ Ուրուգվայի իշխանությունները մեծ հարգանքով եւ ջերմությամբ են վերաբերվում հայ համայնքին:
Հովիկ Աբրահամյանը բարձր գնահատեց բարեկամ Ուրուգվայի հետ Հայաստանի հարաբերությունները, կարեւորեց միջխորհրդարանական կապերի հետագա խորացումը եւ տարբեր բնագավառներում փոխգործակցության ակտիվացումը:
Կողմերը գոհունակությամբ շեշտեցին միջազգային ատյաններում երկու բարեկամ երկրների միջեւ սերտ համագործակցության փաստը` փոխադարձ աջակցության սկզբունքով, ինչը, անշուշտ, շարունակական բնույթ կկրի:
Կարդացեք նաև
ԱԺ նախագահը շնորհակալություն հայտնեց պարոն Ալմագրոյին 2011թ. սեպտեմբերին Մոնտեվիդեոյում կայացած Ուրուգվայի Հայ ազգային խորհրդի եւ Ուրուգվայ-Հայաստան միջխորհրդարանական բարեկամության խմբի կողմից կազմակերպված համաժողովի ժամանակ ղարաբաղյան խնդրի վերաբերյալ հնչեցրած տեսակետի համար: Նա մասնավորապես ասել էր.
«Լեռնային Ղարաբաղը եղել եւ ներկայումս էլ անմիջականորեն կապված է Հայաստանին, նրա հայ բնակչությանը, եւ Ղարաբաղի անկախությունը կամ ապագայում Հայաստանին միանալը լավագույն ճանապարհն է Լեռնային Ղարաբաղի համար»: Արձագանքելով պարոն Աբրահամյանին` Ուրուգվայի արտգործնախարարը նշեց, որ Ուրուգվայը, առաջինը ճանաչելով եւ դատապարտելով Հայոց ցեղասպանությունը, հիմք դրեց Ցեղասպանության ճանաչման միջազգայնացման գործընթացին եւ հավելեց, որ այժմ էլ պատրաստակամ է օժանդակելու Հայաստանի շահերին առնչվող յուրաքանչյուր հարցում:
Հանդիպման ընթացքում քննարկվեցին այլ հարցեր եւս:
