Քիչ առաջ Կենտրոնի ոստիկանությունից ազատ են արձակվեց նաեւ այդտեղ բերման ենթարկված ակտիվիստներից վերջինը՝ Գոռ Առաքելյանը: Մյուս ակտիվիստների պատմելով, ոստիկաններին զայրացրել էր տղայի հակառուսական մակագրությամբ շապիկը:
Մաքս անունով ակտիվիստն էլ պատմում էր, թե թույլ չի տվել, որ առգրավեն իր Եռագույն դրոշը, մինչդեռ մյուսներից իրեր են վերցրել: «Ես իմ իրավունքները լավ գիտեի եւ պահանջում էի ասել, թե ինչի համար եմ բերման ենթարկվել»,-ասում էր նա: Երիտասարդը Aravot.am-ին պատմեց, որ ոստիկանության մի մայոր ակտիվիստներին ասում էր. «Գնացեք ռուսների ոտքերն ընկեք, որ ձեզ տիրություն անեն»:
Վարգես Գասպարին խոսելով ընդդեմ Պուտինի եւ մաքսային միության երթի մասնակիցների հանդեպ ոստիկանների վերաբերմունքից, ասաց. «Ես պայքարում եմ, որ պուտինյան Ռուսաստանը չգա Հայաստան, տանջանքները, որ հիմա արդեն բացահայտ են արվում, էլ չլինեն, սա մարդու իրավունքների ոտնահարման արտահայտություն է, որը կիրառվում է հենց Պուտինի այցի օրը»:
Նա ՀՀ ոստիկանապետ Վլադիմիր Գասպարյանի մասին ասաց, որ ծառայում է օլիգարխներին ու Պուտինին, նաեւ հայտարարեց, որ պատրաստ է ամեն ինչի, եթե անգամ իրեն դատի տան:
Կարդացեք նաև
Ի դեպ, 15-ամյա Էրիկ Իսրայելյանին, որը նույնպես բերման էր ենթարկվել եւ ազատվել, մայրը թույլ չտվեց պատասխանել լրագրողների հարցերին:
Գոհար ՀԱԿՈԲՅԱՆ
