Այսօր «Ելակետ» մամուլի ակումբում ասուլիսի ժամանակ քաղտեխնոլոգ Կարեն Քոչարյանը որքան էլ պնդեց, որ չի ցանկանում խոսել «Что? Где? Когда?» հեռուստախաղի մասին, այնուամենայնիվ լրագրողների դիտարկումներին, որ հայկական եթերով ռուսալեզու հաղորդում հեռարձակելը դեպի ռուսաֆիկացում է տանում, պատասխանեց. «Այդ հաղորդումը ազգային փոքրամասնությունների համար է: Օրենքով թույլատրվում է, Հայաստանի Հեռուստատեսության մասին օրենքով, սեւով սպիտակի վրա գրված է, որ յուրաքանչյուր հեռուստաընկերության 20 տոկոսը թույլատրվում է պատրաստել հաղորդումներ օտար լեզուներով՝ ազգային փոքրամասնությունների համար»:
Կարեն Քոչարյանն ասաց, որ հաղորդումը պատրաստելու համար իրեն դիմել են ազգային փոքրամասնությունները, եւ եթե ցանկանում ենք նույնը տեսնել հայալեզու տարբերակով, կարող ենք դիմել հեռուստաընկերություններին դա կազմակերպելու համար: «Հիմա դուք բռնանում եք իմ ցանկության վրա»,- հակադարձեց նա լրագրողներին:
Հայերենը ռուսաֆիկացնելու մասին էլ ասաց. «Մի երկրում, որտեղ 98 տոկոսը, կամ 96 տոկոսը մոնոէթնիկ հայեր են, խոսել, որ կռուսաֆիկացվի հայերենը, ես համարում եմ անիմաստ»:
Հռիփսիմե ՀՈՎՀԱՆՆԻՍՅԱՆ
