«Կարգապահական պաշտոնանկությունների մասին դեռ վաղ է խոսել, որովհետեւ ծառայողական քննություն է ընթանում: Երբ հանձնաժողովի նախագահը կզեկուցի`մենք համապատասխան միջոցները կձեռնարկենք: Իհարկե, տույժեր, շատ խիստ, կլինեն: Պաշտոնանկություններ կլինեն: Գոնե այդ ստորաբաժանման ղեկավարը պաշտոնից կազատվի, որովհետեւ իրենք պարտավոր են իմանալ իրադրությունը, որը տիրում է իրենց ստորաբաժանումում»,- այսօր խորհրդարանում մի քանի լրագրողների հետ զրույցում հայտարարեց պաշտպանության նախարար Սեյրան Օհանյանը`անդրադառնալով նախօրեին ՊՆ զորամասում տեղի ունեցած զինվորի միջադեպին :
Նախարարն ավելի վաղ հայտարարել էր, որ դեպքը գրանցվել է միջանձնային հարաբերությունների արդյունքում : Լրագրողներից մեկի հարցին ի պատասխան, Սեյրան Օհանյանն ասաց, որ քննության տարբերակներից մեկն էլ սպանության վարկածն է, քանի որ ինքնասպանության դրդելն առավելապես սպանություն է, քան ինքնասպանություն:
«Այն պատասխանատուները, որոնք պարտավոր էին համագործակցել նաեւ իրավական ոլորտից, ռազմական ոստիկանությունից, նրանք նույնպես իրենց տույժը խիստ կերպով կստանան»,-հայտարարեց նախարարը:
Պատասխանելով լրագրողներից մեկի`Լյուքս Ստեփանյանի գործին վերաբերվող հարցին էլ, Սեյրան Օհանյանն ասաց, որ այդ գործում ինքը խնդիր չի տեսնում: Հիշեցնենք, որ դատապաշտպանը հայտարարել էր, որ քննությունը միակողմանի է ընթանում: «Մոտ ժամանակներս գործը կուղարկվի դատարան: Այդ դեպքում, խնդիրներ չունենք, որովհետեւ կա կոնկրետ զոհվողը, կրակողը: Այդ դեպքում դժվար չէ, որպեսզի քրեական ամբողջ գործընթացն իրականացվի»:
Կարդացեք նաև
Հակոբ Ինջիղուլյանի գործի մասին էլ նախարարն ասաց, որ հայկական կողմն ամեն ինչ անելու է, որպեսզի նրան ետ վերադարձնի, թեպետ Ադրբեջանի հետ պետական հարաբերությունների բացակայությունը բարդացնում է գործը: Սեյրան Օհանյանը վերահաստատեց իր հայտարարությունն այն մասին, որ «Հակոբի վերադարձից հետո նրա նկատմամբ ոչ մի քրեական հետապնդում չի լինի»:
Նելլի ԳՐԻԳՈՐՅԱՆ
