Ինչպես ահազանգում են մասնագետները` վերջին 3-4 տարում Գյումրիում զգալիորեն ավելացել է թմրամոլների, հատկապես բենզին սրսկվողների թիվը, որոնք հավերժ ամբաստանյալ են. անընդմեջ դատվում են Շիրակի մարզի ընդհանուր իրավասության դատարանում:
Երկու օր առաջ դատավոր Էդուարդ Մանուկյանի նախագահությամբ դատարանը լսեց 50-ամյա Արտյոմ Հրաչիկի Առաքելյանի դեմ հարուցված քրեական գործը, ով թեև ամուսնացած է, երեխաներ ունի, սակայն պարզվում է, որ առանց գաղութի ապրել չի կարող: Վերջինս դատվում էր արդեն 7-րդ անգամ . իր, այսպես ասած, գաղութային կյանքը սկսել է 1994 թվականից, սկզբում դատվել է գողություն, խարդախություն կատարելու, իսկ վերջին 3 անգամ` թմրանյութ օգտագործելու համար:
Հետաքրքիրն այն է , որ թմրամոլները կալանավայրից ազատվելուն պես, ձգտում են նորից այնտեղ հայտնվել, տվյալ դեպքում Արտյոմ Առաքելյանը, 2013 թվականի ապրիլի 30-ին ազատ արձակվելով, նույն տարվա հոկտեմբերին նորից բռնվել է:
Դատավորների ասելով, գյումրեցի թմրամոլները միշտ ձգտում են դատվել 268 հոդվածի 1-ին մասով , այսինքն փորձում են չափը չանցնել ու գոնե մեկ տարվա ազատազրկման ենթարկվել: Բանն այն է , որ ՀՀ Քրեական օրենսգիրքը տարանջատում ու տարբեր պատիժներ է սահմանում զգալի ու խոշոր չափով օգտագործողների համար, իսկ գյումրեցի թմրամոլների գերակշռող մասը բավարարվում է զգալի չափով, որպեսզի իրենց պատիժը գոնե մեկ տարուց ավել չկրեն: Քրեական օրենսգրքի 268 հոդվածը, որը կոչվում է «թմրամիջոցների կամ հոգեներգործուն նյութերի ապօրինի շրջանառությունն առանց դրանք իրացնելու նպատակի սահմանում է».
Կարդացեք նաև
1. Առանց իրացնելու նպատակի թմրամիջոցներ կամ հոգեներգործուն նյութեր ապօրինի պատրաստելը, վերամշակելը, ձեռք բերելը, պահելը, փոխադրելը կամ առաքելը՝ պատժվում է կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը մեկ տարի ժամկետով:
2. Նույն արարքները, որոնք կատարվել են խոշոր չափերով՝ պատժվում են ազատազրկմամբ՝ առավելագույնը երեք տարի ժամկետով:
3. Նույն արարքները, որոնք կատարվել են առանձնապես խոշոր չափերով՝պատժվում են ազատազրկմամբ՝ երկուսից վեց տարի ժամկետով:
Տվյալ դեպքում ամբաստանյալը դատապարտվել է 1 տարի ազատազրկման, վերջինս պատրաստել ու օգտագործել է նարկոտիկի ամենավտանգավոր ու էժան տեսակը, բենզինից թմրանյութ է ստացել ու սրկսվել, իսկ այն մահաբեր է և շատ տարածված Գյումրու նույնիսկ կենտրոնական թաղամասերում:
Եթե ի նկատի ունենանք, որ ստաժավոր, խրոնիկական թմրամոլները մեծ թվով երիտասարդների են փչացնում, ուրեմն կարելի է ասել, որ Վլադիմիր Գասպարյանի թմրամոլությունը կանխարգելելու ակցիան Գյումրիում կարծես թե չի ստացվում, վերջիններս պատժվում են այն ժամանակ, երբ արդեն թմրանյութը պատրաստած ու օգտագործած են լինում:
Նունե ԱՐԵՎՇԱՏՅԱՆ
