«Սահմանում վերջին կատարվածը ոչ թե պետք է համարենք ուղղակի ողբերգական դեպք, այլ այստեղ խոսքը հետևողական, ագրեսիվ քաղաքականության մասին է, որը անթաքույց վարում է Ադրբեջանը»,-այսօր «Հայելի» ակումբում հայտարարեց «Ընդդեմ իրավական կամայականության» ՀԿ-ի նախագահ Լարիսա Ալավերդյանը:
Հիշեցնենք, որ Ղարաբաղա-ադրբեջանական շփման գծում ադրբեջանական զինուժի իրականացրած դիվերսիոն հարձակման հետևանքով զոհվել էր կրտսեր սերժանտ Արմեն Հովհաննիսյանը:
Լարիսա Ալավերդյանը նշեց, թե պետք է հասկանանք, որ գործ ունենք ակնհայտորեն նման քաղաքական դրսևորումների հետ:
Տիկին Ալավերդյանը սահմանին կատարվածը համարում է զորավարժություններ: Այնուհետև մանրամասնեց. «Դա փորձարկում է, թե ինչպես կանդրադառնա այս ամենին միջազգային հանրությունը, մասնավորապես Մինսկի խումբը: Կարծում եմ, որ ստի վրա հիմնված և թողտվությամբ արմատ գցած թեզերն են բերել նրան, որ Ադրբեջանն իրեն նման իրավունք է վերապահում»:
Կարդացեք նաև
Նալբանդյան-Մամեդյարով հանդիպման համատեքստում քննարկելով իրավիճակը՝ տիկին Ալավերդյանը նշեց. «Այդ հանդիպումների արդյունքն է այն, որ լայնածավալ պատերազմական հնարավորությունները նման հանդիպումներով փակվում են»:
Գրականագետ Վարդան Դևրիկյանը զինվորի հերոսության մասին խոսելով հիշեց Հրանտ Մաթևոսյանի խոսքերը, թե «մենք մեր միջից Մովսես ենք ծնում» ու նկատեց. «Հիմա նրանց միջից մի Մովսես ծնվեց, և այս տղան կրակը իր վրա վերցրեց: Այսինքն՝ սա խոսում է այն մասին, որ ինչ ուզում է լինի, մեր ժողովուրդն ավելի բարձր է, քան մեր հասարակությունը և քաղաքական ուժերը; Խոնարհվենք մեր զինվորի առաջ, ում մտքով կանցներ, որ նան սխրանք կարելի է»:
Կատարվածի պատճառների մասին խոսելով՝ պարոն Դևրիկյանն ասաց. «Սա կապված է նաև այն բանի հետ, որ տապալի ՀՀ-ում զորակոչի ընթացքը: Թուրքիան Ադրբեջանի միջոցով անընդհատ երկրորդ ճակատ է բացում: Սա կապված էր նաև ՀՀ Մաքսային միության անդամակցության հետ»:
Լարիսա Ալավերդյանն էլ հավելեց. «Սա կապված է նաև Բաքվի դեպքերի հետ: Ադրբեջանցիները մատաղի նման նշում են զոհվածների հիշատակը, որ պետք է զոհաբերվի թշնամու շարքերից առնվազն մեկ հոգի: Այսպիսով` իրենք նշում են իրենց սուտ հորինածին երկրի համար զոհվածների օրը»:
Տաթև ՀԱՐՈՒԹՅՈՒՆՅԱՆ
