Սեւանա լճից տարեկան 70 միլիոն խմ ջուր բաց թողնելու ՀՀ կառավարության որոշումը «Սեւան Ազգային պարկի» նախկին տնօրեն Դավիթ Սուխուդյանը անթույլատրելի է համարում, հատկապես, որ այն լինելու է հինգ տարի շարունակ: Մասնագետը նշում է, որ տարեկան 170 միլիոն արդեն վերցնում են Սեւանից, գումարած այդ 70 միլիոնն էլ, կստացվի տարեկան 240 միլիոն:
Պարոն Սուխուդյանը գտնում է, որ կառավարության պատճառաբանությունը, թե Սեւանի ջրով պետք է փրկեն Արարատյան դաշտավայրի շուրջ 8000 գյուղատնտեսներին, որոնց այգիները չորանում են ջուր չլինելու պատճառով, ուղղակի պատրվակ է, քանի որ նրա համոզմամբ, եթե 500-ից ավելի ապօրինի հոր շահագործողները փակեն այդ հորերը, որոնք անխնա օգտագործում են Արարատյան դաշտավայրի հորերի ջրերը, ապա գյուղատնտեսները շատ լավ էլ ջուր կունենան:
Դավիթ Սուխուդյանը գտնում է, որ Որոտանի ՀԷԿ-ի վաճառքը նույնպես մեծ վնասներ կհասցնի Սեւանին, քանի որ ՀԷԿ-երի համալիրի հետ վաճառվել է նաեւ 4 ջրամբար, որոնցից մեկի` Սպանդարյանի ջրամբարով 160 միլիոն խմ հավելյալ ջուր է բերում Սեւանին:
Նախկին տնօրենի վստահեցմամբ, այդ քանակի ջուր Սեւանից վերցնելու դեպքում, լճի համար խիստ վնասակար է. «Մենք կունենանք Սեւանի մակարդակի անկում, որն իր հետեւից կբերի բնապահպանական բացասական երեւույթներ`ջրիմուռների ավելացում, ճահճացում, որն ամենավտանգավորն է Սեւանի համար»:
Կարդացեք նաև
Մինչդեռ Դավիթ Սուխուդյանը գտնում է, որ Սեւանա լիճը պետք է դիտվի որպես քաղցրահամ ջրի պաշար. «Շատ երկրներում ջուրը նավթից թանկ է եւ այդ առումով մոտ ապագայում մենք այս տարածաշրջանում կլինեինք իշխող: 10-15 տարի հետո ջուրը կունենա ոսկու գին»:
Դ. Սուխուդյանի խոսքերով, Սեւանի ավազանում տեղի ունեցող հանքարդյունաբերությունը նույնպես մեծ վնասներ է հասցնում լճի էկոհամակարգին: Մասնավորապես «Սոթքի» հանքավայրի շահագործման պատճառով սարերը փշրվում են, եւ ապարները լցվում են գետերը, որոնք էլ այդ ապարները բերում են լցնում Սեւանա լիճ: Բնակչության մեղքը Սեւանա լճի աղտոտման հարցում եւս կա. Սեւանի այն վտակները, որոնք անցնում են գյուղերի միջով, կոյուղաջրերով ողողված գետի ջուրն իրենց հետ բերում են Սեւան: Դ. Սուխուդյանի ներկայացմամբ, Սեւանի ամենամաքուր վտակը Արփա վտակն է, որը չէր անցնում գյուղերի միջով:
Լուսինե ԲՈՒԴԱՂՅԱՆ
