«Գազի հարցով» քաղաքական մեծամասնության առաջարկով ստեղծված հանձնաժողովի հետ ՀԱԿ պատգամավոր Նիկոլ Փաշինյանը հույսեր չի կապում, բայց կարծում է, որ դա մի հնարավորություն է, որ ԱԺ պատգամավորները բարձրացնեն հարցեր, որոնք ընտրողներին լայնորեն հետաքրքրում են: Անկախ հանձնաժողովի գոյությունից, ըստ Փաշինյանի, հասարակությունը պարտավոր է ստանալ կորուստների, կալորիականությանը վերաբերվող հարցերի պատասխանները եւ հասկանալ, թե ինչ է տեղի ունենում ընդհանրապես:
«Ի՞նչն է պատճառը, որ Հայաստանը էժան գազը թողած գնում է թանկ գազ»,- հարցնում է պատգամավորը`նկատի ունենալով իրանական գազը: Նա վստահ է, որ այս հարցն ուսումնասիրության կարիք ունի:
«ՄՄ մտնելու պարագայում պետք է մաքսային տարիֆների փոփոխություն լինի: Հիմա Հայաստանում գազի ներմուծման համար մաքսատուրք սահմանված չէ: Նախնական տեղեկություններով, դա ՄՄ-ում սահմանված է: Սա չի՞ նշանակում որ ՄՄ մտնելով, մենք արհեստականորեն թանկացնում ենք այն գազը, որը ներմուծում ենք Իրանից: Սրանք հարցեր են, որ, անպայման, պետք է քննարկել, օրակարգում պահել եւ այդ առումով, ես, անկեղծ ասած, կարծում եմ, խնդիրը ոչ թե զուտ գազային հանձնաժողովի գործունեությունը եւ նրա հետ կապված հույսերն են, այլ քան կա հանձնաժողովը, նշանակում է, որ այս հարցերը մնում են քաղաքական օրակարգում`քննարկման մակարդակում»,- ասաց պատգամավորը:
Նելլի ԳՐԻԳՈՐՅԱՆ
