Արարատյան Հայրապետական թեմի առաջնորդարանում այսօր կայացավ օպերային երգիչ Արման Նշանյանի «Հայր մեր» հոլովակի շնորհանդեսը: Սա Արման Նշանյանի երգ-աղոթքն է, որը կոչվում է «Մենության գիշեր»: Սիրված դերասանն ու երգիչն ասում է, որ իրեն աղոթել սովորեցրել են տատիկն ու մայրը: «Այս երգով ուզում եմ քաջալերել մարդկանց: Մենք չպետք է մոռանանք, որ դարեր շարունակ մեզ պահել է մեր հավատքը, Հայ առաքելական եկեղեցին: Այն մեզ համախմբել, պինդ է պահել Վարդանանց պատերազմից մինչև Ղարաբաղյան պատերազմը: Մենք միշտ պայքարել ենք մեր հավատքի, ազատության համար և հիմա չպիտի թույլ տանք, որ դրսի ազդեցությամբ, աղանդների միջոցով կարողանան բնաջնջել և պառակտել մեր ազգը»,- ասում է Արման Նշանյանը:
Երգի երաժշտության հեղինակը Լիանա Անդրեասյանն է: Տեսահոլովակի ռեժիսորն Արման Նշանյանն է, օպերատորը՝ Սուրեն Թադևոսյանը: Տեսահոլովակում Արմանը ներկայանում է չորս տարբեր կերպարներով, որոնք իրենց փրկության լույսը տեսնում են եկեղեցում:
Շնորհանդեսին բացման խոսքով հանդես եկավ Արարատյան Հայրապետական թեմի առաջնորդական փոխանորդ, գերաշնորհ տեր Նավասարդ արքեպիսկոպոս Կճոյանը:
Նավասարդ սրբազանը ողջունեց տեսահոլովակի հեղինակին, ապա ասաց, որ կավաշեն մարդը, որ կյանքի ընթացքում ենթակա է փչացման, հոգին ի վերջո վերադառնում է Աստծուն:
Գոհար ՀԱԿՈԲՅԱՆ