Հայաստանցի պատանի ջրացատկորդ Վլադիմիր Հարությունյանը Մեքսիկայի Գվադալահարա քաղաքում անցկացված վարկանիշային մրցաշարում, որին ընդհանուր առմամբ մասնակցել են աշխարհի 121 երկրների շուրջ 150 ջրացատկորդներ, 10 մետր աշտարակացատկում 427 միավորով գրավել է 9-րդ տեղը եւ Հայաստանի համար օգոստոսին Չինաստանում կայանալիք 2-րդ պատանեկան ամառային օլիմպիական խաղերի ուղեգիր նվաճել:
Հայաստանի ջրացատկի ֆեդերացիայի նախագահ Գաբրիել Ղազարյանն Aravot.am-ին փոխանցեց, թե մարզիչ Հրաչյա Չանդիրյանը մրցավայրից իրեն տեղեկացրել է, որ Վլադիմիրը նախնական մրցափուլն ավարտել է 6-րդ տեղով, իսկ եզրափակչում ընթացել 2-րդ եւ 3-րդ հորիզոնականներում: Սակայն երկու ցատկերում սխալ է թույլ տվել եւ պայքարն ավարտել 9-րդ հորիզոնականում:
Գվադալահարայում մեր մյուս ներկայացուցիչը` Լեւ Սարգսյանը, որին կանոնակարգի համաձայն թույլ չեն տվել մասնակցել աշտարակացատկին, հանդես գալով 3 մետր ոստնակացատկում, նույնպես մտել է եզրափակիչ, սակայն, այնտեղ համապատասխան միավորներ հավաքել չի կարողացել:
Աշոտ ՀԱԿՈԲՅԱՆ