«Վատ է, երբ երկրի ղեկավարը իր տեղում չէ, կոռումպացված է, բայց փոփոխությունները պետք է օրինական ճանապարհով կատարվեն»,-այսօր «Հայելի» ակումբում լրագրողների հետ հանդիպմանը հայտարարեց ՀՀԿ խմբակցության պատգամավոր Կարինե Աճեմյանը:
Նա երկու օր առաջ է վերադարձել Ուկրաինայից և խոսեց իր տպավորությունների մասին. «Ուկրաինացի ժողովուրդը առանձնապես խուճապի չի մատնվում: Մայդանից ընդամենը երկու կանգառ այն կողմ ժողովուրդը շատ հանգիստ ապրում է: Երևի թե մեր բնազդն այլ է: Մեզ համար տասը հոգին շատ մեծ զոհ էր, տարիներ շարունակ խոսում ենք այդ մասին, բայց առանձնապես նման մտահոգություններ չտեսա: Սա հեղափոխությունը իրենց շատ հետ է մղելու: Հեղափոխության այն վսեմ գաղափարը այնտեղ չկա, նրանք այստեղից- այնտեղից գումար ուզելու խնդիր ունեն»:
Տիկին Աճեմյանի կարծիքով՝ Ուկրաինայում տեղի ունեցող բոլոր այդ գործընթացները մյուս երկրների համար դաս պիտի լինեն, որ «սահմանադրությունը տրորելով հեղափոխություն իրականացնելն անընդունելի է այն վայրում, որտեղ դու ապրում ես»:
Կարինե Աճեմյանի կարծիքով՝ ՌԴ-ն «դիտորդի կարգավիճակում չպետք է լինի, Ուկրաինայի ռուսալեզու բնակչությունն իրեն պետք է ապահով զգա»:
Կարդացեք նաև
«Ժառանգություն» խմբակցության պատգամավոր Թևան Պողոսյանի կարծիքով՝ ուկրաինական զարգացումների դասերից մեկն էլ այն է, որ «չի կարելի հաշվի չառնել փոքր խմբերի մտահոգությունները, ի վերջո գուցե Մայդանը տեղափոխվի այլ երկիր»: Իսկ ընդդիմության համար, ըստ Թևան Պողոսյանի, դասն այն է, որ «պետք է այլընտրանքային օրակարգ ձևավորել, քանի որ այսօրվա դրությամբ դժվար են կարողանում կողմնորոշվել, թե որը պետք է լինի հաջորդ քայլը»:
Անդրադառնալով Լևոն Տեր-Պետրոսյանի՝ մարտի 1-ի հանրահավաքին հնչեցրած դիտարկումներին և հնարավոր համախմբումներին՝ տիկին Աճեմյանն ասաց. «Առաջին նախագահի խոսքում նաև դրական շեշտադրումներ տեսա, քանի որ նա բացառեց որևէ գործողություն ՀԱԿ-ի կողմից, որը կվտանգի երկիրը: Սա հատկապես այն պարագայում, երբ հաշվի առնելով այն, որ իրենք բացասական և ծայրահեղական երանգավորումով են հանդես եկել, ուստի դա արդեն լավ է»:
Պարոն Պողոսյանը հավանական համախմբման մասին խոսելով՝ նշեց, թե հնարավոր է դա լինի Րաֆֆի Հովհաննիսյանի, ՀԱԿ-ի, Գագիկ Ծառուկյանի շուրջ: Մեր այն հարցին՝ հնարավո՞ր է դա լինի Ռոբերտ Քոչարյանի շուրջ, պարոն Պողոսյանը հարցը շրջանցեց ու ասաց, թե «չգիտեմ՝ վաղը մյուս օրը ինչ կլինի»:
Կարինե Աճեմյանը հակառակ կարծիքը հայտնեց. «Համարում եմ, որ այս ուժերի համախմբում կլինի երկրորդ նախագահի շուրջ: Նրա գործողությունները խոսում են այն մասին, որ նա ինչ-որ ձևով հայտ է ներկայացնում հետագա քաղաքական գործընթացներին մասնակցելու մեջ»:
Մյուս հարցին՝ մարտի մեկի մեղադրանքները չե՞ն խանգարի Ռոբերտ Քոչարյանին: Կարինե Աճեմյանը հակադարձեց. «Հարց է՝ այդ մեղադրանքները հիմքեր ունեն, թե՝ ոչ»: Պարոն Պողոսյանն էլ, թե՝ եթե լիներ մարտի մեկի հանձնաժողովը, այդ բոլոր հարցերի պատասխանը կտրվեր:
Տաթև ՀԱՐՈՒԹՅՈՒՆՅԱՆ
