Դիլիջանի միջազգային դպրոցի կրթական ծրագրերը չեն կարող լիարժեք իրականացվել, եթե կառավարությունը չիրացնի դպրոցին հարակից` Դիլիջանի մի բնակչի հողամասն ու շինությունները: Մոտավորապես այսպես է ձեւակերպված կառավարության որոշման նախագիծը, որը կառավարության ապրիլի 3-ի նիստին պետք է ներկայացվի վարչապետ Տիգրան Սարգսյանի հավանությանը:
Ինչպես տեղեկանում ենք նիստի օրակարգից, Դիլիջանի բնակիչ Սաթենիկ Սանթրոսյանի հողամասն ու նրա վրա առկա շենք-շինությունները պետք է ճանաչվեն բացառիկ հանրային գերակա շահ, քանի որ ըստ տարածքային կառավարման նախարարության պատասխանատուների, միջազգային կրթահամալիրին անհրաժեշտ է լրացուցիչ հողատարածք, իսկ օտարվող սեփականության օբյեկտի տարածքը գտնվում է կրթահամալիրի անմիջական հարեւանությամբ, ուստի կառավարության կարծիքով, կառավարության ծրագրի իրականացման շահը գերակայում է օտարվող սեփականության սեփականատիրոջ շահերից:
Իրացվող տարածքը կազմում է 0.2215 հեկտար: Որոշման նախագծում, սակայն, բնակչին փոխհատուցելու մասին խոսք չկա:
Լուսինե ԲՈՒԴԱՂՅԱՆ
