Ապրիլի կեսերին Ֆրանսիայում Թուրքիայի դեսպանի պարտականություններին անցած դեսպան Հաքի Ակիլը (լուսանկարում) Հայկական հարցն անվանել է իր աշխատանքային օրակարգի ամենակարևոր 3 խնդիրներից մեկը, որը, սակայն, նաև «ցավագին» է: Մյուս երկուսն են՝ Եվրամիությանը Թուրքիայի անդամակցելու և Ֆրանսիայում բնակվող թուրքերի խնդիրները:
«Հուրիեթ» թերթին նա ասել է, թե պատրաստ է, իր խոսքով՝ «օսմանյան հայերի ողբերգության» 100-րդ տարելիցին՝ 2015 թվականին ընդառաջ, Ֆրանսիայի հայերի հետ «անկողմնակալ երկխոսություն» սկսել:
«Բարեկամության և խաղաղության ժամանակն է եկել: Երկու ժողովուրդներն իրար հետ են ապրել ավելի քան 10 դար, լսել են նույն երաժշտությունը, կիսել նույն մշակույթը, կերել նույն ուտելիքը, ծիծաղել նույն կատակների վրա: Ատելության հողի վրա բաժանումը սիրտս կոտրում է»,- ասել է Թուրքիայի դեսպանը՝ մի այլ տեղում նշելով. «Իրար այդքան նման երկու ազգերը պետք է վերջապես հաշտ լինեն: Մենք պետք է դրա համար ջանքեր գործադրենք»: Նա կարծիք է փոխանցել, թե ցեղասպանության հարցին պետք է անդրադառնան միջազգային դատարանները և ոչ թե տարբեր երկրների խորհրդարանները:
Դեսպանն ասել է նաև, որ իր մեծ պապի երկրորդ կինը հայուհի է եղել, և՝ «նույնիսկ այն դեպքում, երբ ԱՍԱԼԱ-ն թուրք դիվանագետների է սպանել, ես հայերին իմ բարեկամներն եմ համարում»:
Կարդացեք նաև
Պատրաստեց Հովհաննես ԻՇԽԱՆՅԱՆԸ
