«Սերժ Սարգսյանի հետ մենք ընկերներ ենք, բայց մեր ճանապարհները բաժանվեցին»,- այսօր կայացած ասուլիսում, որի ժամանակ հայտարարեց Անվտանգության խորհրդի քարտուղարի պաշտոնից հրաժարվելու մասին, մի քանի անգամ կրկնեց ՕԵԿ առաջնորդ Արթուր Բաղդասարյանը:
ՕԵԿ-ը դառնում է ընդդիմություն, որովհետեւ, ըստ Արթուր Բաղդասարյանի, որը երկու դիսերտացիա է պաշտպանել, քաղաքագիտական բոլոր դասագրքերում, համաշխարհային քաղաքագիտության մեջ կա միայն երկու բան՝ իշխանություն եւ ընդդիմություն:
Չցանկանալով որեւէ բան ասել ԲՀԿ-ի հասցեին՝ Արթուր Բաղդասարյանն, այդուհանդերձ, ասաց, որ իշխանությունից եւ ընդդիմությունից բացի այլ բան լինել չի կարող, «այլընտրանք» կոչվածը արհեստածին երեւույթ է:
«Մենք ոչ մեկի տեղը զբաղեցնելու նպատակ չունենք, ոչ մեկի տեղի վրա աչք չենք դրել, մենք առաջարկում ենք ապագայի մեր օրակարգը, որը պայմանավորված է մեր քաղաքական ուժի հիմնադրույթներով, մոտեցումներով, սկզբունքներով, ՕԵԿ-ը ինպես նախկինում այնպես էլ այսուհետ վճռական է լինելու»,-հայտարարեց ՕԵԿ նախագահը:
Կարդացեք նաև
Նա պատրաստվում է քաղաքակիրթ ձեւով հրաժարականի դիմում ներկայացնել հանրապետության նախագահին, մի քանի հանդիպումներ ունենալ իր ղեկավարած կառույցի՝ Ազգային անվտանգության խորհրդի աշխատակիցների եւ այն մարդկանց հետ, ում հետ համագործակցել է, երախտիքի խոսքեր ասել ու գնալ հանգստանալու:
«Թողնելու եմ կառավարական առանձնատունը եւ գնամ իմ վեց հոգանոց ընտանիքով երեք սենյականոց բնակարանում ապրելու»,-ասաց նա՝ շեշտելով, որ իրեն վերագրված բոլոր դղյակները ֆանտազիա են, բայց ինքը պատրաստվում է առաջիկայում տուն կառուցել:
Իր բիզնեսների մասին էլ ասաց, որ ունի «Հայասի» ընկերությունը, որը կառուցել է չոր հողի վրա, վարկով եւ մինչեւ հիմա էլ վարկերի մեջ է՝ «ոչ մի բան չեմ թալանել, կոպեկներով չեմ սեփականաշնորհել, սկսել եմ զրոյից, վարկերով եւ հարյուրավոր մարդկանց աշխատատեղ եմ տվել»:
Մելանյա ԲԱՐՍԵՂՅԱՆ
Ցավոք, հիշյալ անձը քաղաքական պատասխանատվությունը նույնացնում է ,,ընկերութան,, հետ և նույն ոճով ու նույն բանաձևով արդեն որերորդ անգամ աճպարարությաբ է զբաղվում` ,, հաճախորդի,, և դավաճանի խարանը ընդմիշտ կրելով իր ճակատին և համալրելով ,,դատարկ դհոլի,, համաստեղությունը…