«Մի ստրկացրեք մանկավարժներին» ցուցապաստառներով այս պահին «Դեմ եմ» նախաձեռնության անդամներին են միացել Երեւանի մի շարք դպրոցների ուսուցիչներ:
Նրանք բողոքում են, որ առանց այն էլ ցածր աշխատավարձերից պահումները սրում են առանց այն էլ ծանր սոցիալական վիճակը:
«Բանն այն է, որ ՊԵԿ-ը գործատուներից հաշվետվությունն ընդունում է պարտադիր կուտակային կենսաթոշակի կետ ունենալով: Եթե մեր տնօրենները ներկայացնում են առանց այդ պահումների՝ հաշվետվություն իրենցից չեն վերցնում, իրենք էլ ստիպված պահումներ են կատարում: Գաղտնիք չէ, որ մեր գրեթե բոլոր տնօրենները ՀՀԿ-ի անդամներ են եւ նրանք իրենց գլխից չեն թռչի եւ հօգուտ աշխատողի որոշումներ չեն կայացնի»,-ասաց թիվ հիսուն դպրոցի ուսուցչուհի Օվսաննա Հարությունյանը:
Նա հեգնեց ԿԳ նախարարի ու ՀՀ նախագահի պնդումները, թե ուսուցիչների աշխատավարձերը բարձրացրել են. «Նախագահն էլ ասաց ուսուցիչների աշխատավարձերն ինչքան բարձրացնում ենք՝ էնքան բողոքում են, մի հարցնող լինի նախարարին ու նախագահին, թե ինչքա՞ն եք բարձրացրել, որ մենք բողոքում ենք»: Օվսաննա Հարությունյանն ասաց, որ ուսուցիչները ստանում են քսանութից մինչեւ քառասունհինգ հազար դրամ:
Ուսուցիչները քոչարի պարեցին Չարենցի «Ես իմ անուշ Հայաստանի» բանաստեղծության տակ:
ԿԳ ներկայացուցիչ Արթուր Բաղդասարյանը ներքեւ է իջել բանակցելու: Հավաքվածները պահանջում են նախարարին ներքեւ իջնել:
Կարդացեք նաև
Արփինե ՍԻՄՈՆՅԱՆ
