«Եվրոպան եւ ԵՄ-ն ավելի ակտիվ քայլեր պետք է ձեռնարկեն հակամարտության կարգավորման համար ու հարցի կարգավորմանը պետք է մասնակցի ԼՂՀ-ն ու ԼՂՀ-ի ժողովուրդը»,- այսօր «Արմենպրեսի» մամուլի սրահում կայացած մամուլի ասուլիսում նման դիտարկում արեց Իսպանիայի խորհրդարանի անդամ Ինարիտու Գարսիան: Նա բերեց Կոսովայի օրինակը, որն անմիջապես արժանացավ միջազգային հանրության ուշադրությանը ու նկատեց, որ այդ ժամանակ միջազգային դատարանը հայտարարեց, որ միակողմանի անջատումը համապատասխանում է միջազգային իրավունքի նորմերին:
Ինչպես հայտնի է, Բասկերի խորհրդարանը ճանաչել է հայոց Ցեղասպանությունը: Իսպանիայի խորհրդարանի անդամ Ինարիտու Գարսիան նույն բանաձեւը ներկայացրել է նաեւ Իսպանիայի խորհրդարանում, որը կառավարության ջանքերով տապալվել է: ՀՀ ԱԺ-ում էլ հանդիպումների ժամանակ պատգամավորն ասել է, որ Իսպանիայի խորհրդարանից սպասվելիք բարձրաստիճան պաշտոնյաների առաջիկա այցի ժամանակ Հայաստանը պետք է բարձրացնի հարցերը`Իսպանիայի կողմից հայոց Ցեղասպանության ճանաչման եւ ԼՂՀ հարցի խաղաղ կարգավորման առիթով ակտիվություն դրսեւորելու համար:
Մամուլի ասուլիսից հետո Իսպանիայի խորհրդարանի անդամ Ինարիտու Գարսիան եւ Եվրախորհրդարանի անդամ Ինակի Իռազաբալբեիթիա Ֆերնանդեսն այցելեցին Հայոց եղեռնի զոհերի հուշակոթող:
Նելլի ԳՐԻԳՈՐՅԱՆ