«Բարգավաճ Հայաստան» կուսակցությունն այսօր քաղխորհրդի նիստ է հրավիրել, օրակարգում, ինչպես Aravot.am-ի հետ զրույցում ասաց ԲՀԿ խորհրդարանական խմբակցության քարտուղար Նաիրա Զոհրաբյանը, քննարկվել են ընթացիկ հարցեր, կուսակցական խնդիրներ, Հայաստանի քաղաքական օրակարգում եղած խնդիրներ:
«Լսել ենք պատգամավորների, քաղխորհրդի անդամների տեսակետները: Մենք քննարկել ենք ժողովրդի օրակարգում եղած մտահոգությունները, բոլոր այն հարցերը, ինչ հնարավոր է մեկ նիստի ընթացքում քննարկել»,-ասաց տիկին Զոհրաբյանը:
Aravot.am-ի այն հարցի, արդյոք կառավարության նոր կազմը քննարկվե՞լ է, տիկին Զոհրաբյանն ասաց. «Չի քննարկվել որովհետեւ դա մեզ բացարձակ չվերաբերող հարց է, ով կազմել է, նրան էլ հարցրեք: Մենք ի՞նչ ունենք կազմի հետ, մենք կոալիցիա չենք կազմելու»:
Aravot.am-ի այն դիտարկմանը, որ ԲՀԿ-ն որպես ոչ իշխանական 4 ուժերի` քառյակի նախաձեռնող նախկին կառավարության հրաժարականն էր պահանջում, արդյոք կառավարության այս նոր կազմի համար էր պայքարում քառյակը, Նաիրա Զոհրաբյանն այս մասին ոչինչ չասաց, սակայն նշեց, որ ԲՀԿ մամուլի քարտուղարը պաշտոնական տեղեկատվություն կտարածի, թե ինչ են քննարկել քաղխորհրդի նիստում:
Նելլի ԲԱԲԱՅԱՆ