Գրող Հովհաննես Աղաջանյանն այսօր լրագրողների հետ հանդիպման ժամանակ ներկայացրեց իր «Հեղափոխական դար» գրքի առնչությունները գալիք սահմանադրական բարեփոխումների հետ:
«Վեպի հիմնական գաղափարն այն է, որ քաղաքական կուսակցությունների անհրաժեշտության հին ավանդույթը պատրանք է, խաբուսիկ մշուշ, և կուսակցությունների դերը հասարակության կյանքում պետք է գոնե սահմանափակել»,- ասաց Հ. Աղաջանյանը:
Նա ասաց, որ իր գիրքն ու գրավոր առաջարկությունները (վերջիններս, նրա խոսքով, բխում են կուսակցությունների դերի վերաբերյալ վեպի հիմնական գաղափարից) արդեն ուղարկել է Սահմանադրական դատարան, որտեղից պատասխան նամակ է ստացել, թե իրեն կհրավիրեն պարզաբանումների և քննարկումների համար. «Ինձ թվում է, որ Սահմանադրական դատարանը պիտի գա այն համոզմունքին, որ հանրաքվեի մեջ, որպես տարբերակ, կարելի է ներառել նաև իմ առաջարկները»,- ասաց բանախոսը:
Իսկ նա առաջարկում է խորհրդարանի 131 պատգամավորական մանդատները բաշխել մեծամասնական՝ 71, համամասնական՝ 60 մանդատ հարաբերությամբ, Կենտրոնական ընտրական հանձնաժողովը դարձնել ընտրովի և ոչ թե նշանակովի, կուսակցություններին մեծամասնական ընտրությամբ որևէ իրավունք չվերապահել՝ ոչ իրենց կուսակցության անդամի, ոչ էլ որևէ այլ անձի համար: Նա գտնում է, որ ձեռնարկատիրությամբ, բիզնեսով զբաղվողը ոչ խորհրդարանում, ոչ էլ իշխանության մեջ տեղ չպետք է ունենա. «Այնպիսի օրենքներ պետք է սահմանել, որ կապիտալը երբեք չմիահյուսվի իշխանության հետ»,- հավելեց Հ. Աղաջանյանը:
Սիրանուշ ՀԱՅՐԱՊԵՏՅԱՆ
