Հայաստանի բռնցքամարտի ֆեդերացիան տարբեր տարիքային խմբերի հանրապետության առաջնությունների արդյունքներով արդեն որոշակիորեն ձեւավորել է այն մարզիկների խմբերը, որոնք ընդգրկվել են հավաքական թիմերի թեկնածուների ցուցակ եւ անգամ հասցրել բավականին հաջող մասնակցել միջազգային մրցաշարերի` տանելով մի շարք կարեւոր հաղթանակներ:
Բռնցքամարտիկների փորձարկումն այժմ էլ շարունակվում է: Եվ ինչպես ասում է ֆեդերացիայի նախագահ Արթուր Գեւորգյանը, այս փուլում իր համար բոլորն էլ հավասար են ու բոլորին էլ ուսումնամարզական հավաքներում իրենց լավագույն կողմերով դրսեւորելու, մարզիչների վստահությանն արժանանալու հնարավորություն է ընձեռում: Պարոն Գեւորգյանին ու հավաքականների մարզիչներին այս ընթացքում հաջողվել է բռնցքամարտիկների մեջ ոչ միայն ինքնավստահություն, սեփական ուժերի նկատմամբ հավատ ներարկել, այլեւ հասկանալ տալ, որ միայն ամենաարժանավորներին է իրավունք տրվելու Հայաստանը ներկայացնել միջազգային ռինգերում, եւ որ այդ իրավունքը նրանք պետք է անձամբ վաստակեն:
Արդեն վաղը Բուխարեստում մեկնարկում է կանանց բռնցքամարտի Եվրոպայի առաջնությունը, որտեղ Հայաստանը ներկայացված է լինելու երկու մասնակցով` 49 կգ քաշային Քրիստինե Սարգսյան (լուսանկարում) եւ 60 կգ քաշային Աշխեն Հովհաննիսյան:
Հունիսի 2-ից 8-ը մեր հինգ տղաներ հանդես են գալու Չեխիայում կայանալիք միջազգային մրցաշարում: Այնտեղ ռինգ կմտնեն Հենրիկ Մոքոյանը` 56 կգ քաշային կարգ, Արամ Ավագյանը` 60, Գոռ Երիցյանը` 64, Արման Դարչինյանը` 69 եւ Արման Հովհիկյանը` 75:
Իսկ հունիսի 8-ից 14-ը մեր հավաքականի մյուս թեկնածուները` 64 կգ քաշային Արա Պուլուզյանը, 69 կգ` Վլադիմիր Մարգարյանը, 81 կգ` Տիգրան Արմենակյանը, 91 կգ` Ռաֆայել Սիմոնյանը, ինչպես նաեւ 52 կգ քաշային եւս մի բռնցքամարտիկ, որի անունը կորոշվի մոտ օրերս, իրենց կարողությունները կցուցադրեն Մինսկում կայանալիք միջազգային ներկայացուցչական մրցաշարում:
Ա. ՀԱԿՈԲՅԱՆ
Կարդացեք նաև
«Առավոտ» օրաթերթ
29.05.2014
