Սույն թվականի հունիսի 5-ին հայկական մի շարք զանգվածային լրատվամիջոցներում հրապարակվել են տեղեկություններ, ըստ որի՝ ՀՀ ԱՆ «Արթիկ» ՔԿՀ-ի դատապարտյալներ Արթուր Բաղդասարյանը, Կարեն Փայտյանը և Արմեն Կիրակոսյանը հայտարարել են անժամկետ հացադուլ:
Դատապարտյալների պահանջն այն է, որ ՀՀ ԱՆ «Արթիկ» ՔԿՀ-ի վարչական հանձնաժողովը նպատակահարմար չի գտնում դատապարտյալների վերաբերյալ միջնորդագիր ներկայացնել՝ պատժից վաղաժամկետ պայմանական ազատման, պատժի չկրած մասն ավելի մեղմ պատժատեսակով փոխարինելու հարցերով անկախ հանձնաժողովին: Լրահոսում նշվում է նաև, որ նույն բողոքով նրանց կմիանան նաև այլ դատապարտյալներ:
Վերոգրյալի կապակցությամբ հարկ ենք համարում նշել, որ ՀՀ ԱՆ «Արթիկ» ՔԿՀ-ում հունիսի 6-ի դրությամբ հացադուլ են հայտարարել երեք դատապարտյալ. Արթուր Բաղդասարյանը, Կարեն Փայտյանը և Արմեն Կիրակոսյանը, այլ դատապարտյալներ հացադուլ չեն հայտարարել:
Ըստ ՀՀ ԱՆ «Արթիկ» ՔԿՀ-ի վարչական հանձնաժողովի եզրակացության, վերոհիշյալ դատապարտյալների մերժման համար հիմք են հանդիսացել ռիսկայնության աստիճանը, գնահատման արդյունքները եղել են միջին, ուղղման գործընթացը դրական ընթացք չի ունեցել: Հաշվի է առնվել նաև կատարված արարքի վտանգավորության աստիճանը, պատժի կրման ընթացքում դրսևորված վարքագիծը և ագրեսիվության միջին ցուցանիշը, իսկ դատապարտյալներ Արթուր Բաղդասարյանի և Կարեն Փայտյանի դեպքում՝ նաև նախկինում ունեցած տույժերը:
Կարդացեք նաև
ՀՀ ԱՆ «Արթիկ» ՔԿՀ-ի երեք դատապարտյալներն էլ հիմնարկի վարչական հանձնաժողովի պատասխանը բողոքարկել են Շիրակի մարզի ընդհանուր իրավասության դատարանում և 05.06.2014թ. դրությամբ դատապարտյալ Արմեն Կիրակոսյանի բողոքը մերժվել է. ՔԿՀ-ի վարչական հանձնաժողովի որոշումը համարել է հիմնավոր:
ՀՀ ԱՆ «Արթիկ» ՔԿՀ-ի հացադուլ հայտարարած դատապարտյալներն առանձնացվել են և գտնվում են բժիշկների հսկողության տակ:
ՀՀ ԱՆ ՔԿՎ հանրային կապերի բաժին
