Մոսկվայում այսօր տեղի ունեցած Ադրբեջանի և Ռուսաստանի Դաշնության խորհրդարանական պատվիրակությունների երկկողմ հանդիպմանը Ադրբեջանի խորհրդարանի նախագահ Օգթայ Ասադովը խոստացել է Եվրոպայի անվտանգության և համագործակցության կազմակերպության Խորհրդարանական վեհաժողովի Բաքվում նախատեսված հունիսյան նստաշրջանում Ուկրաինայի հարցում Ռուասաստանի պատվիրակությանն աջակցել։
«Մենք հետևում ենք Ուկրաինայի հարավ-արևելքում տիրող իրավիճակին։ Մենք հասկանում և տեսնում ենք Ռուսաստանի ձգտումները։ Կարծում եմ, որ մենք լինելով ռազմավարական գործընկերներ՝ ԵԱՀԿ-ում նույնպես հանդես կգանք միասնական դիրքորոշմամբ»,- ասել է Ասադովը։
Ադրբեջանի իշխող կուսակցության ներկայացուցիչն իր խոսքում նաև ընդգծել է, որ Ադրբեջանը մեծ նշանակություն Է տալիս Ռուսաստանի հետ երկկողմ հարաբերությունների զարգացմանը։
«Ռուսաստանի հետ մեր երկկողմ հարաբերությունները հասել են ռազմավարական գործընկերության մակարդակի»,-հավելել Է Ադրբեջանի խորհրդարանի ղեկավարը:
Կարդացեք նաև
Ռուսաստանի Պետդումայի ղեկավար Սերգեյ Նարիշկինը նշել է, որ Ռուսաստանը նույնպես շահագրգռված Է Ադրբեջանի հետ ռազմավարական գործընկերության ընդլայնմամբ և խորացմամբ։
ԵԱՀԿ-ի խորհրդարանական վեհաժողովի ամառային նստաշրջանը, որը նախատեսված է հունիսի 28-ից հուլիսի 2-ը, տեղի է ունենալու Ադրբեջանի մայրաքաղաքում։
Հունիսին, ըստ ադրբեջանական լրատվամիջոցների, Բաքու են ժամանելու Ռուսաստանի արտաքին գործերի նախարար Սերգեյ Լավրովը և փոխվարչապետ Դմիտրի Ռոգոզինը։
Ադրբեջանը հանդիսանում է Ռուսաստանի ռազմավարական գործընկերը Հարավային Կովկասում, այս մասին հայտարարել է Ռուսաստանի Դաշնության արտաքին գործերի նախարարության հատուկ ներկայացուցիչ Ալեքսանդր Լուկաշևիչը։
Լրագրողների հետ հանդիպմանը Լուկաշևիչը հայտնել է, որ Ռուսաստանի արտաքին գերատեսչության ղեկավարը հունիսի 17-18-ը պլանավորում է պաշտոնական այցով մեկնել Բաքու։ Սա կլինի երկու երկրների արտաքին քաղաքական գերատեսչությունների ղեկավարների թվով չորրորդ հանդիպումը։
«Ադրբեջանը Հարավային Կովկասում մեր ռազմավարական գործընկերն է։ 2013 թվականին մեր երկրների միջև առևտրաշրջանառությունը կազմել է 3.5 միլիարդ դոլար, ինչը 4 տոկոսով ավելի է նախորդ տարվա համեմատ։ Ադրբեջանում գործում են ավելի քան 500 ռուսական ընկերություններ»,- ասել է Լուկաշևիչը։
Մանրամասները կարող եք կարդալ` «Ազատություն» ռ/կ-ի կայքում
