«Միջազգային մեր գործընկերներ, դուք մեր ձայները չլսեցիք, գնացիք իշխանությունների հետ շատ ջերմ հարաբերություններ ունեցաք»,- հունիսի 6-ին Սահմանադրական բարեփոխումների հայեցակարգի քննարկումների ժամանակ՝ կուսակցությունների մասնակցությամբ, այսպիսի կարծիք հայտնեց «Ժառանգություն» կուսակցության փոխնախագահ Արմեն Մարտիրոսյանը:
Այնուհետև հիշեցրեց «կեղծված» ընտրությունները. «Դուք իշխանությունների հետ մտաք ջերմ հարաբերութունների մեջ, ունեցանք երկու կեղծված համապետական ընտրություններ և Երևանի կեղծված ընտրություններ»:
Այնուհետև կրկին դիմելով միջազգային կազմակերպություններին՝ Արմեն Մարտիրոսյանը նշեց. «Մենք ունեցանք նման կեղծված ընտրություններ, քանի որ չունենք ընտրությունների վերահսկողության մեխանիզմներ: Մենք դա ձեզ զգուշացնում էինք, դուք մեզ չլսեցիք: Արտագաղթը նպաստում է ընտրությունների կեղծմանը: Դա է պատճառը, որ գյուղական համայնքներում, որտեղ ըստ էության բնակչություն չի մնացել, Սերժ Սարգսյանը հաղթանակ տարավ»:
Արմեն Մարտիրոսյանն այս առիթով կրկին շեշտեց ընտրություններին քվեարկած քաղաքացիների ցուցակները հրապարակելու անհրաժեշտության մասին»:
Կարդացեք նաև
Արմեն Մարտիրոսյանը նաև վտանգ է տեսնում ընտրական հանձնաժողովների առումով: Նա նշեց. «ԿԸՀ մակարդակով կարող են ձայները կեղծվել, քանի որ ընտրական հանձնաժողովները գտնվում են իշխանության ձեռքում»:
Հակադրվելով ՀՀԿ-ական պատգամավոր Շիրակ Թորոսյանի այն կարծիքին, թե ավելի լավ կլինի, որ ընտրողն ինքը որոշի վարկանիշային քվեարկության արդյունքում ով մուտք գործի ԱԺ, այլ ոչ թե կուսակցությունն ինքը որոշի, Արմեն Մարտիրոսյանը նկատեց. «Կուսակցություններից ռեյտինգային քվեարկության արդյունքում հնարավոր է ընտրվեն կուսակցականներ, որոնք ձեռնտու են իշխանություններին»:
Կուսակցությունների ֆինանսավորման հարցը ևս բարձրացվեց: Արմեն Մարտիրոսյանն ասաց. «Եթե մենք ուզում ենք կայացած կուսակցություններ ունենալ, պիտի ունենանք անկախ պետական ֆինանսավորում, հակառակ դեպքում քաղաքական միտքը կարող է ենթակա լինել օլիգարխիկ համակարգին, հատկապես, որ մեր երկրում իշխանությունն այնքան է սիրում փոքր ու միջին բիզնեսը, որ այն խեղդվել է»:
Հրայր Թովմասյանը հնչեցված մտահոգություններին այսպես պատասխանեց. «Չէ՞ որ կեղծված ընտրությունների պատճառներից մեկը դատական իշխանության ինչպիսիությունն է, փոքր, սեփական եկամուտները չունեցող համայնքների առկայությունը: Ասել, որ Սահմանադրությամբ բոլոր խնդիրները կլուծվեն, սխալ է»:
Հրայր Թովմասյանը ևս մեկ անգամ շեշտեց. «Սահմանադրությունն այն փաստաթուղթը չէ, որ անգամ աշխարհի լավագույն մասնագետներն այնպիսի սահմանադրություն գրեն, որ բոլոր ժամանակների բոլոր խնդիրներին լուծում կտա: Սահմանադրության արդյունավետության գրավականը քաղաքական ուժերի մասնակցությունն է»:
Տաթև ՀԱՐՈՒԹՅՈՒՆՅԱՆ
