Այսօր Aravot.am-ը Գորիսի մի խումբ ընտրողների անունից նամակ էր ստացել, որտեղ նշվում է, որ Գորիսում հունիսի 8-ին կայանալիք քաղաքապետի ընտրությանն ընդառաջ` Գորիսի բոլոր 9 ընտրատեղամասերում հանձնաժողովների դաշնակցական անդամները դուրս են եկել հանձնաժողովի կազմից: «Կեցցե Հայ Յեղափոխական Դաշնակցությունը»…2014 թվականի հունիսի 8-ին կայանալիք Գորիս համայնքի ղեկավարի ընտրության տեղամասային 9 ընտրական հանձնաժողովներում ՀՅԴ-ն իրենց ներկայացուցիչների (նախագահ,քարտուղար,անդամներ) տեղերը վաճառել է Lիսկային՝ ևս մեկ անգամ վարկաբեկելով կուսակցությանը: ՀՅԴ-ն այսպես է պաշտպանում ազատ,արդար և թափանցիկ ընտրությունների գաղափարը ՀՀ-ում», – նշված է նամակում:
Փորձեցինք Սյունիքի մարզի թիվ 37 ընտրատարածքային ընտրական հանձնաժողովից ճշտել այս տեղեկությունը: Ինչպես փոխանցեցին թիվ 37 ԸԸՀ-ից` 9 տեղամասային ընտրական հանձնաժողովում ընդգրկված դաշնակցական ներկայացուցիչներն ինքնաբացարկ են հայտնել: «Նրանք ինքնաբացարկի դիմումները թիվ 37 ԸԸՀ ներկայացրել են հունիսի 4-ին: Ընդամենը մեկ ընտրատեղամասում է հանձնաժողովի նախագահը ՀՅԴ-ից եղել, մյուս ինքնաբացարկ հայտնած դաշնակցականները հանձնաժողովի անդամներ են եղել: Թիվ 37 ԸԸՀ-ի նախագահի կայացրած որոշմամբ էլ թափուր տեղերը լրացվել են: Նրանց փոխարեն նշանակվել են լիցենզիա ունեցող ու ընտրությունների ընթացքը կազմակերպելու փորձ ունեցող անձինք: Հիմնականում ուղղորդվել ենք այդ սկզբունքով», – տեղեկացրեցին թիվ 37 ԸԸՀ-ից եւ փոխանցեցին, որ ինքնաբացարկ հայտնելու պատճառների մասին տեղյակ չեն: Իսկ դիմում-բողոքներ մինչեւ օրս հանձնաժողովը չի ստացել:
ՀՅԴ-ի Գորիսի տեղական կառույցի նախագահ, ընտրատեղամասերից մեկում հանձնաժողովի նախագահ նշանակված եւ արդեն ինքնաբացարկ հայտնած Արամ Բաբայանից փորձեցինք պարզաբանում ստանալ այս ամենի վերաբերյալ, սակայն վերջինս հրաժարվեց որեւէ պարզաբանում տալ` նշելով, որ հեռախոսով մեր հարցերին չի պատրաստվում պատասխանել: «Պարզաբանում հեռախոսով չեմ տա, եթե ցանկանում եք որոշակի ինֆորմացիա իմանալ` համեցեք Գորիսի մեր գրասենյակ, պատճառների մասին միայն տեղում կպատասխանեմ», -ասաց Արամ Բաբայանը եւ կատարվածի վերաբերյալ այդպես էլ որեւէ բացատրություն չտվեց:
Մեր ունեցած տեղեկություններով` դաշնակցական հանձնաժողովի նախագահի փոխարեն նշանակվել է Գորիսի քաղաքապետարանի աշխատակազմի ղեկավար Գագիկ Հայրապետյանը:
Գորիսում հունիսի 8-ին կայանալիք քաղաքապետի ընտրությանը մասնակցելու իրավունք ունի 16 հազար 171 ընտրող, իսկ թե քանի՞ տոկոսը կմասնակցի ընտրությանը, պարզ կլինի արդյունքների ամփոփումից հետո: Մեր ունեցած տեղեկություններով` քաղաքում չբնակվող ընտրողների մասնակցությունն ապահովելու եւ նրանց քվեները ստանալու համար, Գորիսում արդեն քայլեր են ձեռնարկվում անվճար տրանսպորտային միջոցներով ընտրողների տեղափոխման հարցերը կարգավորելու ուղղությամբ:
Մերի ՍՈՂՈՄՈՆՅԱՆ
