Մոտ մեկ տարի տևած դատավարությունից հետո այսօր Շիրակի մարզի ընդհանուր իրավասության դատարանում ավարտվեց Վազգեն Խաչիկյանի փողերի լվացման գործով դատավարությունը:
Հիշեցնենք, որ կեղծ փաստաթղթեր սարքելու, պետությունից առանձնապես խոշոր չափի` 91.566.229 ՀՀ դրամի կենսաթոշակի, թաղման, նպաստի եւ ժառանգվող գումար հափշտակելու մեջ Գյումրիում մեղադրվում էին 4 պաշտոնյաներ` Գյումրու տարածքային բաժնի պետ Էդուարդ Վարժապետյանը, գլխավոր մասնագետ Արթուր Աբրահամյանը, վճարող տեսուչներ Կիմա Փիլոյանը, Անյա Խաչատրյանը, որը փախուստի մեջ է, և վճարումների ծառայության ստորաբաժանման նախկին պատասխանատու Ռուբեն Մնացականյանը, որը միակ կալանավորվածն էր այս գործով:
Կարդացեք նաև
Այսօր Շիրակի մարզի ընդհանուր իրավասության դատարանի նախագահ Էդուարդ Մանուկյանը 4 տարի ազատազրկման դատապարտեց Արթուր Աբրահամյանին, Կիմա Փիլոյանի համար վերջնական պատիժ սահմանեց 3 տարի 11 ամիս 27 օր, Ռուբեն Մնացականյանին դատապարտեց ազատազրկման 3 տարի ժամանակով և 2 տարով զրկեց նրան ֆինանսատնտեսական գործունեությամբ զբաղվելու իրավունքից, իսկ Էդուարդ Վարժապետյանին թեև դատապարտեց 4 տարվա ազատազրկման, սակայն համաներմամբ նրան ազատ արձակեց:
Դատարանը մասնակիորեն բավարարեց նաև ՀՀ գլխավոր դատախազության քաղաքացիական հայցը` որոշելով Արթուր Աբրահամյանից, Ռուբեն Մնացականյանից ու Կիմա Փիլոյանից ի օգուտ Հայաստանի հանրապետության պետբյուջեի բռնագանձել 54 միլիոն 608 հազար 354 դրամ:
Դատարանի վճիռը բավական ծանր տարավ Ռուբեն Մնացականյանը, ով անիծեց, թե Աստծուց թող գտնեն այս գործը սկսողներն էլ, ավարտողներն էլ:
Լրագրողների հետ զրույցում էլ Ռուբեն Մնացականյանն ասաց. «Այսպիսի համակարգում ապրելն արդեն իսկ հանցավորություն է, իրենք շատ լավ գիտեն մեղավորները որտեղ են, անմեղները որտեղ են, սա խայտառակություն է: Սրանցից ուրիշ բան չէի էլ սպասում: Հանկարծ որ արդարացում լիներ, ես կապշեի, սա շատ կեղտոտ ձեռագիր է, վատ բեմադրած ներկայացում էր, եթե հետևել եք դատերին, ամեն ինչ ապացուցվել է այստեղ, որ անիվը որտեղից է դուրս գալիս, սրանք էդ էլ են հակասում»:
Կիմա Փիլոյանը ևս դժգոհեց, որ այս երկրում արդարություն չկա`մեկ ևս կրկնելով, որ ինքը անմեղ զոհ է, իսկ մեղավորները դրսում են:
Ամբողջական մեղքը իր վրա վերցրած Արթուր Աբրահամյանի փաստաբան Թամարա Յայլոյանն էլ լրագրողների հետ զրույցում տեղեկացրեց, որ այս վճիռը անպայման բողոքարկելու են ՀՀ Վերաքննիչ դատարանում: Նա ասաց, որ դատարանը անարդարացի վարվեց իր պաշտպանյալի նկատմամբ. գործը թեև բացահայտվեց հենց Արթուր Աբրահամյանի ցուցմունքների հիման վրա, սակայն դատարանը մյուսների նկատմամբ պատժաչափը պակասեցրեց, իսկ իր պաշտպանյալի նկատմամբ սահմանեց դատախազի պահանջած պատժաչափը:
Նունե ԱՐԵՎՇԱՏՅԱՆ
