Նկարիչ Արթուր Սարգսյանը Aravot.am-ի հետ զրույցում անդրադառնալով Զվարթնոցի տաճարում կայացած հայտնի միջոցառմանը, որը հանրության մտահոգությունն է հարուցել եւ լայն քննարկման առարկա դարձել, նշեց, որ, օրինակ, Բերտոլուչիի ֆիլմերից մեկում երիտասարդների վազքի մրցույթ կա՝ անմիջապես Լուվրի միջով: «Բնականաբար, նախապես եկել են համաձայնության՝ կարելի՞ է վազել այդ տեղով կամ նկարահանում կատարել: Ինչ վերաբերում է Զվարթնոցին, մանրամասն տեղյակ չեմ, թե ինչ է տեղի ունեցել եւ որ ժամին: Ինքս կնախընտրեի, որ ցանկացած ընկերության միջոցառումը կայանար հուշարձանի ո՛չ աշխատանքային ժամերին ու օրերին, երբ այցելուներ չկան ու նրանց մուտքի համար խոչընդոտներ չեն լինի: Մյուս կարեւոր հանգամանքն այն է, որ պահպանված լինեն բարոյական նորմերը՝ չպղծվի քարը, չստորացնի Զվարթնոցը, կրոնը, մեր պատմամշակութային համակարգը…Եթե պատմական հուշարձանի տարածքում նորմերի մեջ միջոցառում է տեղի ունենում, ուրեմն նորմալ է, իսկ եթե ոչ՝ նման բաներ թույլատրող մշակույթի նախարարությունը պետք է փակվի ու նրա փոխարեն հայրենասեր, մշակույթի պահպան մեկ այլ կառույց ստեղծվի»,- ասում է արվեստագետը:
Արթուր Սարգսյանի համոզմամբ, չարժի 700000 դրամի համար Զվարթնոցի տաճարը վնասող քայլերի գնալ. «Եթե Աբովյան փողոցով քայլենք, ասենք Զվարթնոցի պահպանման համար գումար է հարկավոր, ժողովուրդը հաստատ կտա 1000-2000 դրամով, ու մեկ օրում ավելին կհավաքվի, քան ստորացման ու քծնանքի գնով հավաքվածը»:
Գոհար ՀԱԿՈԲՅԱՆ
