«Թուրքիան շատ սերտ կապեր ունի «ան Նուսրա» ռազմական խմբավորման հետ»,- այսօր՝ հունիսի 19-ին, «Ուրբաթ» ակումբում լրագրողների հետ հանդիպման ընթացքում հայտարարեց Գյումրիի պետական մանկավարժական ինստիտուտի դասախոս, պատմաբան-քաղաքագետ Գագիկ Համբարյանը:
Նրա խոսքերով՝ չնայած «ան Նոսրայի» եւ Իրաքի, եւ Լեւանտի իսլամական խմբավորման վատ հարաբերություններին, Թուրքիան նաեւ սերտ հարաբերությունների մեջ է վերջինիս հետ: Նա նշեց, որ այդ երկու խմբավորումների նախահայրը «Ալ-քաիդան» է.
«Սիրիայում տեղի ունեցող իրադարձությունները շատ մեծ հարված հասցրեցին Թուրքիային, առավել եւս վերջին օրերին ունեցած հաջողությունները՝ Քեսաբի ազատագրումը, ինչպես նաեւ Հալեպում տեղի ունեցած ռազմական գործողությունների ընթացքում Սիրիայի բանակի առաջխաղացումը: Եվ կարելի է նշել, որ տարածաշրջանում տեղի են ունենում շատ խոշոր փոփոխություններ»:
Պարոն Համբարյանի խոսքով՝ ստեղծված վիճակը կազդի հիմնականում Սիրիայի հայկական համայնքի վրա, քանի որ Սիրիայում տեղի ունեցող քաղաքացիական պատերազմի ընթացքում թուրքական ներգրավվածությունն իր դեմ դրած մեծ ծրագիր ունի, որպեսզի վերացնի Սիրիայում բնակվող հայկական համայնքը՝ կոնկրետ հալեպահայությանը.
«Քաղաքացիական պատերազմի ընթացքում այն տարածաշրջանները, որոնք անցնում էին ահաբեկչական խմբավորումների ձեռքը, նույն րոպեին այդտեղ տեղի էին ունենում էթնիկ զտումներ, հայկական եկեղեցիների պղծում: Եվ այստեղ քաղաքացիական պատերազմի մի կողմը ավելի շատ լոյալ է վերաբերվում հայկական համայնքին , դա Բաշար ալ-Ասադն է: Եվ Իրաքում իսլամիստների հաղթանակը պետք է բերի նրան, որ հայկական համայնքը Սիրիայում կարող է վերանալ, որը շատ մեծ հարված կլինի ոչ միայն Հայաստանին, այլեւ ընդհանրապես քրիստոնյա աշխարհին»:
Կարդացեք նաև
Արդյունքում, Գագիկ Համբարյանի կանխատեսմամբ, Իրաքում իսլամիստների հաղթանակը վատ արդյունք կունենա: Նախ կլինի սիրիահայերի մեծ հոսք Հայաստան, այն դեպքում, երբ Հայաստանը ի վիճակի չէ իր սեփական քաղաքացիներին ապահովել՝ սոցիալ-տնտեսական առումով, եւ Թուրքիան տարածաշրջանում կամրապնդի իր դիրքերը:
Ամի ՉԻՉԱԿՅԱՆ
