Այսօր ՀՀ Լոռու մարզպետարանի դիմաց մարդաշատ էր:
«Վանաձոր-Քիմպրոմ» ՓԲԸ-ի աշխատակիցները հերթական բողոքով են
հանդես եկել:
Նրանք շարունակում են պահանջել չվճարված աշխատավարձերը:
Բացի այդ` նրանք պահանջում են հանդիպել ՀՀ էներգետիկայի եւ բնական պաշարների նախկին նախարար, այսօր արդեն ՀՀ նախագահի խորհրդական Արմեն Մովսիսյանի հետ:
Կարդացեք նաև
«Երեւի մի 35 օր առաջ պարոն Արմեն Մովսիսյանը խոստացավ հանդիպել գործարանի աշխատողների հետ` մեր հարցերին համապատասխան լուծում տալու համար: Այդ հանդիպումը առ հիմա չի կայացել: Այդ ընթացքում մի ամսվա աշխատավարձ ենք ստացել: Գործարանի միջոցների վաճառքից գրեթե ամբողջությամբ 2011թվականի աշխատավարձի պարտքը մարվել է, բայց բոլոր դեպքերում հարցը դեռ մնում է հարց, եւս 9 ամսվա աշխատավարձ դեռ ունենք ստանալու: Մեր պահանջների, մեր խնդիրների գերխնդիրն այդ աշխատավարձի պարտքի մարումն է: Մենք արդեն չենք խնդրում, արդեն պահանջում ենք հանդիպել պարոն Մովսիսյանի հետ, որպեսզի մեր այս հարցերին կոնկրետ պատասխան տան` երբ է մեր աշխատավարձերի պարտքերը մարվելու, ստույգ ժամանակացույց, ինչ է սպասվում գործարանին, գործարանի աշխատողներին, եթե գործարանը չի աշխատելու, ինչու մեզ հետ նոր պայմանագիր կապեցին»,-Aravot.am-ի հետ զրույցում ասաց «Վանաձոր-Քիմպրոմ» ՓԲԸ-ի ամոնիակի սինթեզի արտադրամասում հերթափոխի պետ Հրաչիկ Մարտիրոսյանը:
Քիմպրոմցիների հետ ՀՀ Լոռու մարզպետարանի դիմաց սպասում էր նաեւ ՀՀ ԱԺ պատգամավոր Էդմոն Մարուքյանը:
Նա հնարավոր է համարում գործարանի սնանկացումը:
«Հնարավոր համարում եմ, քանի որ գիտեմ, որ շատ մեծ պարտքեր կան` թե էլեկտրաէներգիայի հետ կապված կուտակված, թե գազի, թե աշխատավարձերի, թե նաեւ բանկային պարտավորությունների, նաեւ Վանաձոր քաղաքում գույքահարկի, հողի հարկի հետ կապված»,-նշեց Էդմոն Մարուքյանը:
Մեկ ժամ սպասելուց հետո գործարանի աշխատողներին հայտնեցին, որ Արմեն Մովսիսյանը ՀՀ Լոռու մարզպետ Արթուր Նալբանդյանի միջոցով փոխանցել է, որ այսօր ժամը 16:00-ին գործարանում կհանդիպի աշխատողներից 10-15 հոգու հետ:
Անուշ ԲՈՒԼՂԱԴԱՐՅԱՆ
