ՀՀ նախագահ Սերժ Սարգսյանը շնորհավորական ուղերձ է հղել Ռեջեփ Թայիփ Էրդողանին՝ Թուրքիայի Հանրապետության նախագահի պաշտոնում ընտրվելու կապակցությամբ` Թուրքիայի ժողովրդին էլ մաղթել բարեկեցություն եւ առաջընթաց: Սերժ Սարգսյանի ուղերձը բուռն քննադատությունների տեղիք է տվել եւ քննարկվել տարբեր հարթակներում:
ՀՀ մշակույթի նախկին նախարար, գրող Ռոլանդ Շառոյանը Аravot.am-ի հետ զրույցում ասաց, որ տեքստին ծանոթ չէ, բայց նորմալ է վերաբերվում նախագահի շնորհավորական ուղերձին. «Որեւէ վատ բան չեմ տեսնում, իր հարեւան երկիրն է, նախագահ է ընտրվել, արարողակարգ է, էթիկա, որը պահպանվել է: Նորմալ քայլ է»:
Մտավորականից նաեւ հետաքրքրվեցինք՝ հայերն ամբողջ աշխարհից պահանջում են ճանաչել իրենց ցեղասպանությունը, բայց Հյուսիսային Իրաքում եզդիների հետ այժմ կատարվողին արդյոք համարժե՞ք են արձագանքում: «Ես տեղյակ չեմ, թե իշխանությունները, Ազգային ժողովը, կառավարությունը կամ նախագահը ինչպես են արձագանքել եզդիների հետ կատարվողին, չգիտեմ՝ ինչ են ասել:
Դա ընդհանրապես որպես երեւույթ պետք է դատապարտվի, մանավանդ որ՝ անգամ երեխաների ջարդ է իրականացվել: Անպայման պետք է պետականորեն դատապարտվի, տեղյակ չեմ, գուցե արձագանքել են, իսկ եթե չեն արձագանքել, սխալ են արել, պետք է անպայման դատապարտվի»:
Կարդացեք նաև
Գոհար ՀԱԿՈԲՅԱՆ
