Օգոստոսի 27-ին ժամը 19.00-ին Կամերային երաժշտության տանը կանցկացվի «Կոմիտաս. Վերապրում» համերգային միջոցառումը: Տարին հոբելյանական է, նշվելու է Կոմիտասի 145-ամյակը:
Համերգին կհնչեն Գրիգոր Առաքելյանի կոմիտասյան երաժշտության մշակումները և Վահան Արծրունու «Կոմիտաս. տասը հայտնություն» երգաշարը՝ գրված Կոմիտասի բանաստեղծությունների հիման վրա:
Համերգին հանդես կգա Գրիգոր Առաքելյանը՝ հայկական վիոլա, Հասմիկ Բաղդասարյան՝ մեներգ, Էմմանուել Հովհաննիսյան՝ դուդուկ, Նելլի Մանուկյան՝ ֆյետա, Վահան Արծրունի՝ մեներգ, կիթառ: Հանդես կգա նաև «Les Violons d’Armenie»
լարային քառյակը:
Երգիչ, երգահան Վահան Արծրունին նշեց, որ բացի «տիտուլային» միջոցառումներից, որոնց մասին ոչ ոք ոչինչ չի լսել, իրենք փորձել են նոր խոսք ասել՝ համախմբվելով «կոմիտասյան երևույթի շուրջ»: Պարոն Արծրունին նշեց. «Սա երաժշտական մեծ խաչմերուկ է, որտեղ ոչ թե ժանրային առանձնահատկություններն են, այլ այն վիճակը, որ ստեղծվում է բեմի վրա»:
Կարդացեք նաև
Կոմպոզիտոր, դիրիժոր, հայկական վիոլայի կատարող Գրիգոր Առաքելյանը խոսեց համերգի առանձնահատկության մասին. «Մեր բոլոր դասական խմբերը սովորաբար կատարում են Կոմիտաս, նա ավելի շատ ներկայանում է որպես կոմպոզիտոր: Այս համերգին փորձելու ենք մատուցել կոմիտասյան մոտեցում ու մտածողություն: Նա մեզ համար ոչ թե զուտ կոմպոզիտոր է, այլ մտածելակերպ»:
Պարոն Արծրունին նշեց, որ իրենք ինքնուրույն են իրենց նախաձեռնությունը կյանքի կոչել, իրենց ոչ ոք չի օգնել: Aravot.am-ի հարցին՝ արդյոք նման միջոցառումները չպե՞տք է պետական ֆինանսավորում ստանան, մանավանդ, որ մեր պետությունը պատրաստ էր Նունե Եսայանի համերգի համար միլիոններ ծախսել, իսկ Կոմիտասի համար գումար չկա՞: Վահան Արծրունին նշեց, որ իրենց չեն էլ դիմել Մշակույթի նախարարությանը ու շարունակեց. «Չեմ կարծում, որ արվեստագետը պիտի դիմի մշակույթի նախարարությանը, մշակույթի նախարարության ֆունկցիաներից մեկը արվեստագետին գտնելն է և նրա համար պայմաններ ստեղծելը, քանի որ այդ երկու սկզբունքներից էլ մշակույթի նախարարությունը հեռու է: Մենք՝ որպես արվեստագետ, ոչ մի սպասում էլ չունենք, դրա համար էլ մենք ոչ դիմում ենք, ոչ էլ սպասում: Իհարկե, մենք ակնկալում ենք՝ սա պիտի այնպիսի մի տոն լինի, ամբողջ ազգը ապրի այդ հանգամանքով: Մենք երկար սպասում էին, հետևում էինք ընդհանուր դաշտին, կան հաստիքային արվեստագետներ, որոնք առարկում ու ասում են, թե մեծ միջոցառումներ են սպասվում, բայց ես ինչքանով հարցուփորձ եմ արել, կամ գաղտնի է պահվում այդ ծրագիրը, կամ հերթական գալոչկա դնելու հանգամանք է լինելու նրանց համար: Եթե նույն դրսևորումը, ինչ ունեցան Մեսրոպ Մաշտոցի հանդեպ, ունենանք, այս պարագայում շատ ցավալի կլինի: Մենք սպասել չենք կարող, սրա պատճառով էլ նախաձեռնել ենք այս համերգը»:
Տաթև ՀԱՐՈՒԹՅՈՒՆՅԱՆ
