«Ոսկեգործությունը, ադամանդագործություն եւ ժամագործությունը մեր երկրում արտահանմանն ուղղված արդյունաբերության զարգացման համար գերակա ոլորտներից են հանդիսանում»,- այսօր էկոնոմիկայի նախարարությունում «Yerevan Show 2014» ոսկերչական ցուցահանդեսի վերաբերյալ ասուլիսի ընթացքում ասաց ՀՀ էկոնոմիկայի փոխնախարար Տիգրան Հարությունյանը:
Նրա խոսքով՝ ոսկեգործության ոլորտում արտադրանքի ցուցանիշները ամեն տարի աճում են: Տիգրան Հարությունյանը վստահ է, որ Հայաստանում ոսկեգործության շուկան պետք է արտահանմանն ուղղված լինի:
Էկոնոմիկայի փոխնախարարի խոսքով՝ առաջին երկրներից մեկը, որը հետաքրքրված է հայկական ոսկերչությամբ՝ Ռուսաստանն է. «Ինչպես գիտեք, Մաքսային Միություն մտնելու ճանապարհին է Հայաստանի Հանրապետությունը»:
Նրա խոսքով՝ մեծ հույսեր կան, որ այդ նոր բացվող ճանապարհին Հայաստանը կմտնի 50 մլն-անոց շուկա. «Ինչպես գիտեք Ռուսաստանը արտահանման 6,5 տոկոս մաքսատուրքը հանել է չմշակված ադամանդի վրայից եւ հիմա մեր հայ ադամանդագործները հնարավորություն կունենան ներմուծել ադամանդը աննախադեպ ցածր գներով: Մեծ հույսեր ենք կապում Մաքսային Միության հետ»:
Կարդացեք նաև
Պրն փոխնախարարը տեղեկացրեց, որ այդ օրենքի ընդունումից հետո Ռուսաստանից Հայաստան չմշակված ադամանդի ներմուծման ծավալները ավելացել են, իսկ Բելգիայից՝ նվազել, իսկ արտահանման մասին խոսելիս, նշեց, որ 5,7 միլիարդ դրամի արդյունաբերական արտադրանք է տրվել ադամանդագործության միջոցով, որի մոտ 95 տոկոսը արտահանվել է:
Էլյա ՀՈՎՀԱՆՆԻՍՅԱՆ
