«Մենք չենք խոստացել, որ թեժ աշուն է լինելու, այլ խոստանում ենք, որ քաղաքացիական անհնազանդությունների միջոցով աշունը թեժացնելու ենք»,-այսօր «Մեդիա կենտրոնում» հրավիրված քննարկմանը զգուշացրեց «Ոչ թալանին» քաղաքացիական նախաձեռնության անդամ Ռիմա Սարգսյանը:
Նա տեղեկացրեց, որ օգոստոսի 1-ին էլեկտրաէներգիայի թանկացման դեմ «Լուսավորենք խավարը» խորագրով բողոքի ակցիայի ժամանակ իրենք հրապարակեցին իշխանությանն ուղղած իրենց պահանջները և դրանք կատարելու համար մինչև սեպտեմբերի առաջին շաբաթ ժամանակ տվեցին իշխանությանը, սակայն որևէ արձագանք չեն ստացել: Ուստի նախաձեռնությունը որոշել է քաղաքացիական անհնազանդության բոլոր ձևերն օգտագործելով` պայքարել իշխանությունների` իրենց բնորոշմամբ ապօրինի որոշման դեմ:
Ռիմա Սարգսյանը մանրամասնեց. «Նախատեսում ենք քառյակի հետ համագործակցություն 12+1 կետերի շրջանակներում, քանի որ քառյակի 12 կետերում կա էլեկտրաէներգիայի թանկացման հետ կապված կետ»:
Aravot.am-ը հետաքրքրվեց` չե՞ն վախենում, որ քաղաքացիներից շատերը կհիասթափվեն, քանի որ քաղաքական ուժերի հետ համագործակցության պարագայում իրենց քաղաքացիական շարժումը քաղաքական երանգներ կստանա: «Ոչ թալանին» քաղաքացիական նախաձեռնության անդամ Գևորգ Վահագնին պատասխանեց. «Մենք չենք պատրաստվում կուսակցության վերածվել: Բայց մյուս կողմից` ինչքան էլ մեր շարժումը քաղաքացիական է, մեր պահանջները քաղաքական են դառնում, և դրանց լուծման համար քաղաքական կամք է անհրաժեշտ: Մենք չենք վախենում, որ ինչ որ քաղաքական հոսանքների մեջ կհայտնվենք, բայց չենք էլ ցանկանում վերածվել կուսակցության»: Գևորգ Վահագնին տեղեկացրեց, որ իրենք համագործակցության հայտ են ներկայացրել գրեթե բոլոր կուսակցություններին ու շուտով պաշտոնական պատասխաններ կստանան:
Նախաձեռնության անդամ Սուրեն Էյրամջյանը հիշեցրեց, որ խումբն ի սկզբանե ձևավորվել է թալանի բոլոր տեսակների դեմ պայքարելու համար ու մանրամասնեց. «Ժամանակին մեր պահանջները հրապարակվել են. կասեցնել էլեկտրաէներգիայի թանկացման որոշումը և ստեղծել հանձնաժողով, որ կզբաղվեր այդ հարցով: Մեր ամենապարզ հաշվարկները ցույց տվեցին, որ եթե մանր սպառողների քանակը վերցնենք` ամսական մոտավորապես հազար դրամ ծախսը ավելացնելու պարագայում երկու տարի հետո այդ պարտքը կմարվի: Արդյունքում ստացվում է, որ երկու տարի անց այդ կազմակերպությունը կստանա գերշահույթ: Բայց պայմանագրում անգամ չկար որևէ դրույթ, թե երկու տարի անց ինչ պիտի լինի»:
Կարդացեք նաև
Նախաձեռնության մյուս անդամներից Վաղինակ Շուշանյանն էլ տեղեկացրեց, որ հանդիպել են տարբեր գիտնականների հետ և ստացել առաջարկներ, ինչպես անել, որ էլեկտրաէներգիան ավելի ցածր սակագնով ստացվի: Մասնավորապես նա փոխանցեց, որ գիտնականներն առաջարկում են արևային էներգիան օգտագործելու տարբերակը, այլ ոչ թե հանրությանը վաճառել միայն ՋԷԿ-երի և ատոմակայանի հոսանքից ստացված էլեկտրաէներգիան, որի գինը տարեցտարի բարձրանում է:
Տաթև ՀԱՐՈՒԹՅՈՒՆՅԱՆ
