ՀՀ ԿԳ նախարարության կրթության պետական տեսչությունը վերջին երկու տարում Երևանի և մարզերի դպրոցներում ու նախադպրոցական հաստատություններում կատարած ուսումնասիրությունների արդյունքում մի շարք խախտումներ է արձանագրել, որոնց մասին այսօր լրագրողների հետ հանդիպման ժամանակ խոսեց տեսչության պետ Արամ Կարապետյանը. «Օրինակ՝ Գյումրու 22 նախադպրոցական ուսումնական հաստատություններում ստուգումների ժամանակ պարզվեց, որ տնօրեններից 8-ն իրենց կրթական ցենզով չեն համապատասխանում տնօրենի պաշտոնին, և մեր ստուգումներից հետո 8 տնօրեններն էլ ազատվեցին աշխատանքից: Կրթությամբ իրենց զբաղեցրած աշխատանքին չէին համապատասխանում 38 մանկավարժներ: 2014 թ. այս պատճառներով, ընդհանուր առմամբ, 30 տնօրեն և 100 մանկավարժ են ազատվել աշխատանքից»,- ասում է Ա. Կարապետյանը:
Տեսչության պետին մտահոգում է նաև մեկ աշակերտի՝ մեկից ավելի դպրոցներում գրանցված լինելը, որը, նրա խոսքով, մեր կրթական հաստատություններում ամենատարածված խախտումներից մեկն է. «Այդպիսով տնօրենները հավելյալ գումար են ստանում բյուջեից, որովհետև դպրոցի ֆինանսավորումը կատարվում է ըստ աշակերտների քանակի՝ յուրաքանչյուրին՝ տարեկան 120. 000-ական դրամ: Դեպքեր կան, որ աշակերտը եռակի է վարձատրվում, որովհետև գրանցված է 3 դպրոցներում»,-ասում է պարոն Կարապետյանը:
Կրթության պետական տեսչության լավագույն ուսուցիչներից և Մանկավարժական համալսարանի մասնագետներից կազմված առարկայական հանձնաժողովներն ուսումնասիրել են Արագածոտնի, Արմավիրի, Արարատի, Վայոց ձորի, Կոտայքի մարզերի ուսումնական հաստատություններում դասավանդվող մի քանի առարկաների՝ հայոց լեզվի, ռուսաց լեզվի, պատմության և մաթեմատիկայի դասավանդման ու երեխաների գիտելիքների մակարդակը. «Օրինակ՝ հայոց լեզվի ստուգումը կատարեցինք թեստերով և թելադրությամբ: Տարբերությունն աղաղակող էր. թեստից անբավարար է ստացել միայն 8%-ը, իսկ թելադրությունից՝ 36%-ը: Դասարաններ կան, որտեղ 80%-ը թելադրությունից անբավարար է ստացել»,- տեղեկացրեց Ա. Կարապետյանը՝ արդարացի համարելով շատերի դժգոհությունը թեստային համակարգից. «Ճիշտ է, որ ոչինչ չի սովորեցնում, երեխան, պարզապես, մեխանիկորեն լրացնում է թեստը»,- փաստում է տեսչության պետը: Վերջինիս հատկապես զարմացնում է այն, որ անբավարար գնահատական ստացողներն ավագ դպրոցներում ավելի մեծ թիվ են կազմում, քան հիմնական դպրոցներում. «Մաթեմատիկայից, օրինակ, ավագ դպրոցում 43%-ն անբավարար է ստացել»,- ասում է նա:
Նշենք, որ այս արդյունքները գրանցվել են հանրապետության 1400 դպրոցից 230-ում իրականացված ստուգումների արդյունքում:
Կարդացեք նաև
Սիրանուշ ՀԱՅՐԱՊԵՏՅԱՆ
