Հայաստանի պետական ֆիլհարմոնիկ նվագախումբն իր՝ 2014-2015 թթ. համերգաշրջանն սկսեց Իտալիայում կայացած հյուրախաղերով: Աշխարհի տարբեր ծայրերից դասական երաժշտության կենտրոն Իտալիայում հավաքված բազմահազար երաժշտասերներին ֆիլհարմոնիկ նվագախումբը՝ իր գեղարվեստական ղեկավար և գլխավոր դիրիժոր Էդուարդ Թոփչյանի գլխավորությամբ, ներկայացրեց մեծանուն կոմպոզիտորներ Ա. Խաչատրյանի, Մուսորգսկու, Ռիմսկի-Կորսակովի և Չայկովսկու ստեղծագործություններից:
Իսկ ահա հայրենիքում ֆիլհարմոնիկն իր համերգաշրջանը կազդարարի Երևանյան միջազգային երաժշտական փառատոնի 8-րդ մեկնարկով:
Ինչպես այսօր լրագրողների հետ հանդիպման ժամանակ ասաց պարոն Թոփչյանը, սեպտեմբերի 12-ից հոկտեմբերի 24-ն ընթացող ամենամյա փառատոնային ծրագիրը կներառի վեց սիմֆոնիկ և մեկ կամերային համերգ, Մեծ Բրիտանիան ներկայացնող երկու մեծահամբավ երաժիշտների՝ դաշնակահար Էշլի Վոսի և ջութակահար Բորիս Բրովցինի, ինչպես նաև թավջութակահար Վահրամ Սարաջյանի մենահամերգները:
Փառատոնին կմասնակցեն ասպարեզի հայտնի ու մեծ վաստակ ունեցող երաժիշտներ Հայաստանից և արտասահմանից: Հայաստանյան հանդիսատեսը հնարավորություն կունենա ունկնդրելու դաշնակահարներ Կիրիլ Գերշտեյնի, Արմինե Գրիգորյանի, Ալեքսանդր Մելնիկովի, ջութակահարներ Սերգեյ Կրիլովի, Անուշ Նիկողոսյանի, ֆլեյտահար Մասիմո Մերչելլի, կիթառահար Ֆաբիո Զանոնի և այլոց կատարումները:
Կարդացեք նաև
Փառատոնի հանդիսավոր բացման համերգին ելույթ կունենա միջազգային ճանաչում ունեցող դաշնակահար Կիրիլ Գերշտեյնը, որը կկատարի Ռախմանինովի Դաշնամուրի թիվ 2 կոնցերտը:
Կիրիլ Գերշտեյնն արդեն երկրորդ անգամ է համատեղ հանդես գալու ֆիլհարմոնիկի հետ և ասում է, որ նվագախումբը շատ հարազատ է իրեն. «Եթե երաժիշտը վերադառնում է մի երկիր, որտեղ նախկինում էլի ելույթ է ունեցել, նշանակում է՝ ում հետ համագործակցել է, ստեղծագործական ընդհանուր եզրեր է գտել, հետևաբար՝ հոգեհարազատ է դարձել իրեն: Կարծում եմ՝ ֆիլհարմոնիկի հետ ընկերության, համագործակցության նորանոր հեռանկարներ կբացվեն»,- ասում է Գերշտեյնը:
Սիրանուշ ՀԱՅՐԱՊԵՏՅԱՆ
Համաձայն Մտավոր սեփականության մասին օրենքի՝ երաժշտությունը կոմպոզիտորի ստեղծագործությունն է, իսկ կատարողական արվեստը՝ հարակից ճյուղը, (այսինքն՝ ենթակա ճյուղը): Այդ լավ է, որ հանրաճանաչ կատարողներ են մասնակցելու փառատոնին, իսկ ծրագրում ի՞նչ է հնչելու… Նշեք փառատոնի ծրագիրը և փառատոնի ծթագթում ինչ տեղ է զբաղեցնում հայ երաժշտությունը: Հիշեցնեմ՝ որ մեր պետական մշակութային քաղաքականությունն է՝ ,,Ազգային մշակույթի պահպանումը, զարգացումը, տարածումը,, հանուն որի, կառավարության կողմից, հիմնադրված են պետական երաժշտական կոլեկտիվները… Հարգանքով՝ Աշոտ Բաբայան
Վերևում՝ փառատոնի ,,ծթագթում,,-ը կարդալ՝ ծրագրում / սխալը՝ համակարգիչինն է /