«Պետք է համբերություն ունենալ, և ամեն ինչ կպարզվի ու Լևոն Հայրապետյանը դուրս կգա: Մենք բոլորս՝ երկուսուկես միլիոն հայություն Ռուսաստանում մտահոգված է այդ խնդրով»,-այսօր «Հայաստան-Սփյուռք» հինգերորդ համաժողովի ընթացքում պատասխանելով լրագրողների հարցին՝ իրեն չի՞ մտահոգում ռուսաստանաբնակ հայ բարերար Լևոն Հայրապետյանի կալանավորման հարցը, այսպես պատասխանեց Ռուսաստանի հայերի միության նախագահ Արա Աբրահամյանը:
Շարունակելով նա ասաց. «Մենք այս հարցում համագործակցում ենք Հայաստանի հետ: Լևոն Հայրապետյանի խնդիրը մեզ համար ամենակարևորն է»: Այնուհետև վստահեցրեց, թե «ամեն ինչ կանեմ, որ գոնե այս ընթացքում Լևոնը տանը լինի»: Հակադարձմանը, թե նրա կալանքն արդեն մինչև հունվար երկարաձգվել է, պարոն Աբրահամյանն արձագանքեց. «Պիտի փորձենք օգտակար լինել: Հայրապետյանը ակտիվ բարերարություն է արել ՀՀ-ին, Ղարաբաղին, հիմա ժամանակն է, որ մենք մեր խոսքն ասենք նրա նկատմամբ: ՌԴ-ի ողջ հայությունն ուզում է մեկ բան, որ նա ազատության մեջ լինի մինչև դատավարության ավարտը: Եթե մարդ մեղավոր է, առավել ևս բարերար, մենք պետք է լինենք իրավաբանական դաշտում: Բայց ես համարում եմ, որ նա արդար է: Վլադիմիր Եվտուշենկովի՝ տնային կալանքը կարագացնի պրոցեսը: Եթե Եվտուշենկովն ինքը բոլոր հարցերին պատասխանի, այդ օրը Լևոնը դուրս կգա»:
Հարցին Կրեմլում ի՞նչ են խոսում՝ Հայաստանը Մինսկում ստորագրելու՞ է Եվրասիական տնտեսական միությանը (ԵՏՄ) միանալու մասին փաստաթուղթ, պարոն Աբրահամյանը պատասխանեց. «Դուք էլ եք լսում, թե ինչ են խոսում Կրեմլում…ամեն ինչ գնում է այնպես, ինչպես պետք է, կան խնդիրները՝ ՌԴ նկատմամբ պատժամիջոցներ, Ուկրաինայում իրավիճակ, դրանք, իհարկե, անկախ անդամակցությունից, չեն կարող ՀՀ-ի վրա չազդել, քանի որ Ռուսաստանում ապրում է երկուսուկես միլիոն հայություն: Ինչքան ՌԴ-ում լինի կայուն և ՌԴ-ն զարգանա, այնքան մեզ համար լավ»: Արա Աբրահամյանը ամփոփեց. «Ես պատճառներ չեմ տեսնում, որ չստորագրվի այդ փաստաթուղթը»:
Հարցին վտանգ չի՞ սպառնում ՀՀ երկրորդ նախագահ Ռոբերտ Քոչարյանին այն առումով, որ ձերբակալվել է «Սիստեմա» ընկերության հիմնադիր Վլադիմիր Եվտուշենկովը, իսկ Քոչարյանը «Սիստեմա» ընկերությունների տնօրենների խորհրդի անդամ է ու հնարավո՞ր է նա էլ ընդգրկվի գործում, Արա Աբրահամյանը պատասխանեց. «Ընդհանրապես վտանգ չկա, քանի որ Ռոբերտ Քոչարյանը լրիվ ուրիշ ֆունկցիաներ, պարտականություններ ու աշխատանք ունի: Նա կապ չունի դրա հետ»:
Կարդացեք նաև
Տաթև ՀԱՐՈՒԹՅՈՒՆՅԱՆ
