«Սպառված քաղաքական թոշակառուի ոչինչ չասող բառերի կույտ, որն ավելի ցայտուն դարձրեց թե Տեր-Պետրոսյանի, եւ թե ՀԱԿ-ի «քաղաքական հանգուցյալ» լինելու անհերքելի փաստը»,- Aravot.am-ի հետ զրույցում անդրադառնալով եռյակի` ԲՀԿ, ՀԱԿ եւ «Ժառանգություն» կուսակցությունների համատեղ հանրահավաքում ՀԱԿ առաջնորդ Լեւոն Տեր-Պետրոսյանի ելույթին, ասաց Ազգային ժողովի փոխնախագահ, ՀՀԿ խոսնակ Էդուարդ Շարմազանովը:
Հիշեցնենք, հանրահավաքում, Լեւոն Տեր-Պետրոսյանը կրկին խոսել էր ավգյան ախոռները մաքրելու մասին եւ մասնավորաբար ասել էր. «Սարգսյանական վարչախմբից օր առաջ ազատվելու բազմաթիվ հիմնավորումներից կառանձնացնեի 4 գլխավորները՝ ոչ 2008-ի, ոչ 2013-ի ընտրություններում Սերժ Սարգսյանը չի ընտրվել: Նախագահական աթոռը զավթել է բռնությունների, 10 քաղաքացիների գնդակահարության գնով: Վարչական ռեսուրսի օգտագործման եւ ընտրակաշառքի գնով է ձեւավորվել նաեւ ԱԺ մեծամասնությունը: Թե՛ երկրի նախագահը, թե՛ խորհրդարանը, օրինակարգ, լեգիտիմ իշխանություններ չեն, օրինակարգ չեն նաեւ նրանց կողմից կազմավորված բոլոր մարմինները՝ բացառությամբ բանակի, որը մշտական գործոն է: Նույն վիճակն է տիրում նաեւ գրեթե բոլոր ՏԻՄ մարմիններում: Ոչ օրինակարգ լինելու հետ մեկտեղ ՀՀ իշխանական բուրգը թաղված է կոռուպցիայի մեջ»:
Նելլի ԳՐԻԳՈՐՅԱՆ