ՀՀԿ փոխնախագահ Ռազմիկ Զոհրաբյանը հաստատում է, որ ՀՀ նախագահ Սերժ Սարգսյանն ու ԲՀԿ առաջնորդ Գագիկ Ծառուկյանը հանդիպել են:
Հանդիպման մանրամասները պարոն Զոհրաբյանն այսօր «Հենարան» ակումբում ասուլիսի ժամանակ չցանկացավ ներկայացնել՝ չնշելով ոչ քննարկված հարցերը, ոչ էլ հանդիպման օրը:
Նա, անդրադառնալով եռյակի իշխանափոխության կոչերին, ասաց, որ այսօր հեղափոխությունների ժամանակը չէ, որովհետեւ Հայաստանին ներկայումս կայունություն է պետք:
Նրա համոզմամբ, Ռուսաստանին դուր չի գա, որ ԵՏՄ անդամ Հայաստանում ներքին կայունություն չլինի. «Եթե երկրի ներսում լինեն ցնցումներ, նշանակում է, որ արդեն Եվրասիական տնտեսական միությունում են այդ ցնցումները, ինչի համար Ռուսաստանում գլուխ չեն շոյում, ավելի ճիշտ հակառակ են շոյում»:
Կարդացեք նաև
Հարցին, թե ստացվում է, որ Սերժ Սարգսյանը Ռուսաստանի հրահանգով է Կառավարությանը առաջարկել վերանայել 12 կետերը, Ռազմիկ Զոհրաբյանը պատասխանեց. «Մենք այս դեպքում պետք է խորհրդակցենք ոչ միայն Ռուսաստանի, այլ նաև ԵՏՄ անդամ մյուս անդամ երկրների հետ: Բայց իմ անձնական կարծիքն է, որ մեր երկրի ներսում ցնցումները կարող են դուր չգալ նաև Ռուսաստանին: Մենք մի միություն ենք, և մեր ներքին ցնցումները կարող են նրանց դուր չգալ»:
Արփինե ՍԻՄՈՆՅԱՆ
