Թուրքագետ Անդրանիկ Իսպիրյանը կարծում է, որ ապրիլի 24-ը Չանաքքալեի ճակատամարտում Թուրքիայի հաղթանակի 100-ամյակի օր հռչակելը կարող է ռիսկային լինել Թուրքիայի համար և հեղինակազրկել վերջինիս: Մանավանդ, որ նա արդեն հասցրել է բացասական իմիջ ձեռք բերել հատկապես Սիրիայի, Եգիպտոսի և իր արտաքին քաղաքականության հետ կապված այլ խնդիրների պատճառով։
«Չանաքքալեի ճակատամարտի 100-ամյակին Թուրքիայում բավականին վաղուց էին պատրաստվում, բայց օրվա ընտրությունն արդեն բարոյականությունից դուրս է»,- այսօր լրագրողների հետ հանդիպման ժամանակ այսպիսի տեսակետ արտահայտեց Ա. Իսպիրյանը՝ ընդգծելով, որ Թուրքիայի մտադրությունը շատ հստակ է. «Պարզ է, որ Ռ. Էրդողանն այս քայլով փորձում է աշխարհի ուշադրությունը կենտրոնացել այս իրադարձության վրա և ուշադրությունը շեղել Հայոց ցեղասպանության 100-րդ տարելիցից: Իհարկե, Թուրքիան մեծ երկիր է, և ինչ-որ չափով կարող է դա իրեն հաջողվել, բայց ապրիլի 24-ը Չանաքքալեի ճակատամարտում հաղթանակի օր հայտարարելն առնվազն ցինիզմ է ու անարգանք մեկ ու կես միլիոն զոհված հայերի հիշատակին»,-ասաց թուրքագետը՝ նկատելով, որ ընտրված ամսաթիվը որևէ առնչություն չունի ամիսներ տևած ճակատամարտի այս կամ այն կարևոր իրադարձության հետ. «Այդ ճակատամարտում Թուրքիայի համար կարևոր ամսաթիվը մարտի 18-ն է»,- հիշեցրեց Ա. Իսպիրյանը:
Անդրադառնալով Թուրքիայի նախագահի կողմից ճակատամարտի հաղթանակի տոնակատարությանը ՀՀ նախագահին մասնակցելու հրավեր ուղարկելուն և ՀՀ նախագահի պատասխանին՝ թուրքագետն ասաց. «Դիպուկ էր Սերժ Սարգսյանի պատասխանը և միաժամանակ՝ զերծ հուզականությունից, էթիկայի սահմաններում էր և հիմնավորված կետ առ կետ: Հենց միայն այն, որ նախագահը նշեց՝ մեզ մոտ ընդունված չէ, որ հյուրընկալողը հյուրընկալվի առանց պատասխան ստանալու, մեծ արձագանք գտավ թուրքական լրատվամիջոցներում, և Թուրքիան արդեն իսկ պարտվողական դիրքերում հայտնվեց»,- նշեց բանախոսը:
Ինչ վերաբերում է տոնակատարությանը մյուս երկրների մասնակցությանը, Ա. Իսպիրյանը չի կարծում, որ հրավերն ընդունելու դեպքում նրանք կմասնակցեն առաջին դեմքերի մակարդակով. «Դժվար է պատկերացնել, որ, օրինակ, Օբաման կամ Օլանդը ներկա կգտնվեն Չանաքքալեի ճակատամարտի տոնակատարությանը»,- ասաց թուրքագետը՝ հավելելով, որ Անկարան ամեն ջանք կգործադրի՝ իր կազմակերպած շոուին նույնիսկ ամենաաննշան երկրներին ներգրավելու համար:
Կարդացեք նաև
Սիրանուշ ՀԱՅՐԱՊԵՏՅԱՆ
