Այսօր ԱԺ նիստում ԲՀԿ խմբակցության քարտուղար Նաիրա Զոհրաբյանն ասաց, որ այսօր 4 քաղաքական ուժեր պատրաստել են առաջարկություններ՝ Շրջանառության հարկի մասին օրենքի հետ կապված:
Նա առաջարկեց, որ ԱԺ նախագահ Գալուստ Սահակյանը ոչ իշխանականների հետ քննարկի, հանդիպում կազմակերպի վարչապետի, նախարարների հետ եւ վերջապես լուծում տան այդ խնդրին, ոչ թե անընդհատ հետաձգեն:
Գալուստ Սահակյանն ասաց, որ կան բազմաթիվ առաջարկներ շահագրգիռ կազմակերպություններից, անհատ քաղաքացիներից: Դրանք կքննարկեն, նոր, եթե անհրաժեշտություն կլինի, կքննարկեն ոչ իշխանականների հետ:
«Ժառանգություն» խմբակցության ղեկավար Ռուբեն Հակոբյանը դժգոհեց. «Ձեզ չեն հարցնում՝ ի՞նչ կարծիքի եք, պարոն Սահակյան, արժի՞ հանդիպել ոլորտային նախարարների, վարչապետի հետ, թե՞ ոչ: Խնդիրը նրանում է, որ 4 խմբակցություն դիմում է ձեզ, ասում է՝ կազմակերպեք հանդիպում, ասելիք ունենք: Ես չեմ հասկանում, ի՞նչն է պատճառը, որ ասում եք՝ չեմ ուզում, եղբայր, դա պառլամենտարիզմի հետ կապ ունի՞, թե՞ ոչ»:
Կարդացեք նաև
Գալուստ Սահակյանը պատասխանեց, որ քննարկմանը դեմ չի, բայց ուզում է բոլորի հետ միասին քննարկեն այդ հարցը. «Դուք ասում եք՝ բերեք մի հատ հանդիպենք Գալուստ Սահակյանի առանձնասենյակում, կառավարությունն էլ լինի, որ ասենք՝ ժողովո՜ւրդ, տեսեք հլը ինչ ենք անում: Մենք այդ ճանապարհով գնացողը չենք, մենք խնդիր պիտի լուծենք: Մենք ուզում ենք այնպիսի վիճակ ստեղծենք, որ եւ ցանկալի լինի այն մարդկանց, որոնք բողոքում են, եւ ցանկալի լինի քաղաքական ուժերին: Վա՞տ բան ենք ասում: Չէ, դուք ասում եք, մենք, միեւնույն է, արտահերթը կհավաքվենք կանենք, որ մի անգամ էլ ասեք՝ տեսեք, ժողովուրդ, մենք անում ենք՝ ձեր կողքին կանգնած ենք»:
Հետո Գալուստ Սահակյանը ընդդիմությանը հեգնեց, որ այդ ամենը ընդամենը 10-րդ օրը կմոռանան. «Ոնց որ սահմանամերձ համայնքների օրենքն էիք քննարկում: Այդքան պայքարեցինք, այդ պայքարելուց հետո որեւէ մեկդ չգնաց այդ ժողովրդին հարցնեիք՝ լա՞վ եք, վա՞տ եք: Ստիպված նորից մենք հանձնախումբ կազմեցինք ուղարկեցինք, որպեսզի տեսնենք էլ ինչ առաջարկություններ ունեն: Հատվածային վարքագծով քաղաքականությունը որոշակի չի դառնում: Մենք հատվածային քաղաքականությանը դեմ ենք»:
Հռիփսիմե ՋԵԲԵՋՅԱՆ
